“Mədəniyyət paytaxtımız olan Şuşada artıq 3-cü Xarıbülbül festivalı keçirildi. Azərbaycan xalqı tarixi torpaqlarına qayıtmaqla bu ərazilərə yeni nəfəs gətirib. Prezident İlham Əliyevin də söylədiyi kimi, bu festival bizim üçün qayıdış və ləyaqət bayramıdır. Şuşa bizim mədəniyyət paytaxtımız olmaqla yanaşı, həm də milli sərvətimizdir. Şəhərin hər qarışında millilik var. Bu şəhər hər daşında, hər qayasında Azərbaycan ruhunu qoruyub saxlayıb”.
Bu sözləri Ednews-a millət vəkili Könül Nurullayeva açıqlayıb. Onun sözlərinə görə, "Xarı bülbül" Beynəlxalq musiqi Festivalı məşhur xanəndə Seyid Şuşinskinin 100 illik yubileyi ilə əlaqədar 1989-cu ildən keçirilməyə başlayıb. Festival hər il may ayında Yaponiya, ABŞ, Türkiyə, Almaniya, İsrail, İtaliya, İspaniya, Avstriya, Əfqanıstan, SSRİ ölkələrinin iştirakı ilə keçirilib və təkcə Azərbaycanda deyil, bütün dünyada ən vacib mədəniyyət tədbirlərindən biri hesab olunurdu. Biz son 3 ildir böyük qələbəmiz sayəsində bu ənənəni bərpa etdik. Xarıbülbül müsiqi festivalı ölkənin mədəni həyatında əlamətdar hadisələrdən birinə çevrilib.
“Hər il keçirilən ənənəvi Xarıbülbül festivalını, Vaqif poeziya günlərini keçirərkən şəhidlərimizin də ruhu şad olur. Azərbaycanın qəhrəman oğulları yalın əllə, əlbəyaxa döyüşlərlə Şuşanı düşmən tapdağından azad edib. Təsadüfi deyil ki, iki il əvvəl Şuşada uzun fasilədən sonra keçirilən Xarıbülbül musiqi festivalı da böyük qələbəni canları və qanları ilə bəxş edən şəhidlərimizin əziz xatirəsinə həsr olunmuşdu.
Şuşada bizim bütün ənənələrimiz bərpa olunmaqla yanaşı, həm də burada müxtəlif mədəniyyətlərin dialoqu təşkil olunur. Xarıbülbül festivalı ilə bu ənənənin təməli qoyulub. Budəfəki festival da maraqlı məqamlarla yadda qaldı. Beynəlxalq ictimaiyyət qədim Azərbaycan şəhəri olan Şuşanın yenilənən simasını gördü. Müxtəlif xalqların musiqi nümunələrinin təqdimatı həm də Azərbaycanın tolerant və multikultural ölkə olduğunu göstərdi. Biz Şuşaya və ümumilikdə Qarabağa qayıtmaqla bölgəyə rifah gətirmişik. Bu gün Şuşadan, Cıdır düzündən yayılan musiqi sədaları müasir inkişaf standartını göstərir. Dövlət başçımızın da söylədiyi kimi, çoxkonfessiyalı, çoxmillətli ölkələrdə, cəmiyyətlərdə inkişaf, birlik, milli həmrəylik və sülh olur. Azərbaycan isə bu sülhün qarantı rolunda çıxış edir”.
Deputat xanım qeyd edib ki, son bir neçə ildə ölkəmizə gələn qonaqlar, ictimai-siyasi xadimlərin Şuşaya səfəri təşkil olunur. Biz artıq ölkə və beynəlxalq əhəmiyyətli tədbirlərimizi Şuşada təşkil edirik. Xarici qonaqlar işğal dövründəki Şuşa ilə indiki Şuşa arasındakı fərqi görür, bu tarixi torpağın əsl sahibləri tərəfindən dirçəldilməsinin şahidi olur. Şuşa həm də Türk dünyasının mədəniyyət paytaxtı kimi öz nüfuzunu möhkəmləndirir.
“Prezident İlham Əliyev və birinci xanım Mehriban Əliyevanın Şuşaya səfəri zamanı şəhərdə aparılan abadlıq-quruculuq işlərinin yüksək səviyyədə davam etdiyinin şahidi olduq. Yeni açılışı olan Şuşadakı Yaradıcılıq Mərkəzinin hazırkı binası da ölkə əhəmiyyətli memarlıq abidəsi siyahısındadır. Binada vaxtı ilə Ağa Qəhrəman Mirsiyab oğlunun Karvansarası yerləşib. Heydər Əliyev Fondu tərəfindən 2022-ci ildən aparılan bərpa işləri zamanı bina ilkin vəziyyətinə qaytarılıb. Şuşanın bütün abidələrini orijinal üslubda bərpa etməklə bir daha dünyaya mədəniyyət paytaxtımızın tarixən Azərbaycan torpağı olduğunu sübut edirik. 3 əsrə yaxın yaşı olan Şuşa hər zaman Azərbaycana məxsus olub. Təsadüfi deyil ki, ermənilər tərəfindən qurudulmuş “Xan qızı Natəvan” bulağından da su məhz azərbaycanlılar bu əraziyə qayıtdıqdan sonra gəldi. Artıq bu bulaqlar heç zaman qurumayacaq. Şuşanın hər qarışı canlanmaqdadır. Bu torpaqların həqiqi sahibləri bunu təmin edir. Bir sözlə, Şuşanın hər qarışında Azərbaycan mədəniyyətinin, tarixinin, eləcə də böyük Qələbəmizin izini, rəmzini görürük”.
Oğuz
