Son günlər paytaxda və bölgələrimizdə qeyri-sabit hava şəraiti hökm sürür. Bu da əkin sahələrinə ciddi təsir edir. Belə havaların keçməsi meyvə-tərəvəz qıtlığına gətirib çıxara bilərmi? Belə olduğu təqdirdə bazarlarda bahalaşma müşahidə olunacaq.
Məsələ ilə bağlı Ednews-a Tərəvəzçilik Elmi-Tədqiqat İnstitutunun İdarə heyətinin sədri Elmar Allahverdiyev qeyd edib ki, hazırki mövsüm dövründə qeyri-sabit hava şəraiti müşahidə edilir.
“Mövsümə xarakterik olmayan hava şəraiti kənd təsəfürratı bitkilərinə, bitkiçilik sahəsinə təsir edə bilir. Lakin son günlərdə olan hava şəraiti qısa xarakterlidir. Geniş miqyaslı deyil. Kiçik lokal olduğundan elə də bitkilərə təsir göstərmir. Yaz dövründə bitkiçilik sahəsində regizatizaya ilkin dövrüdür. Bu zaman deyən zərərlər ciddi fəsadlara yol aça bilər. Lakin hazırki hava şəraiti ciddi fəsadlar yaratmayıb. Bu da meyvə-tərəvəz qıtlığın gətirib, çıxara bilməz. Ölkəmizdə həm mövsüm, həm də qeyri-mövrüm dövründə də istixana şəraitində tərəvəzlər istehsal olunur. Bu da qıtlığın olmayacağı deməkdir”.
Quba sakini Manafova Mehparə bildirib ki, Qonaqkənd kəndində hava çox soyuq keçir.
“Neçə gündür yağış yağır. Hətta qar yağan ərazilərimizdə var. Bu havalar isə əsasən, gilas, alça və ərik ağaclarına təsir edir. Təzə açılmış güllərini ya yağış yuyub aparır, ya da külək. Ümumiyyətlə, neçə ildə ilk dəfədir görürük ki, mayda qar yağsın. Bağa palçıqdan girmək olmur. Nə qədər meyvə-tərəvəz, göy-göyərti ziyan olub. Hətta dünən qabda toyuq-cücə üçün həyətə su qoymuşdum. Səhər suyu təzələmək üçün gedəndə gördüm ki, su donub. Belə havaların keçməsi təsərrüfatımıza təsir edir”.
Şəmkir sakini Qara Möjlümov ötən il quraqlıq olduğu üçün çox qıtlıq olduğunu vurğulayıb:
“Şəmkirdə ciddi su problemi var. Bu problem keçən il də var idi, bu il də davam edir. Məsələn deyə bilərəm ki, moruq ən çox su tələb edən giləmeyvədir. Ötən il suyun az olmasına görə, moruqlar çox balaca və az idi. Bu ildə havaların dəyişkənliyi yəqin ki, bağa-bostana təsir edir. Məhsulların keyfiyyəti ötən illərə nisbətdə zəifdir”.
Xaçmaz sakini Aygün Abdullayevanın sözlərinə görə isə aqrotexniki qaydalara düzgün riayət olunubsa, havaların belə keçməsi məhsullara çox ziyan verə bilməz.
“Məsələn fındıq bağında hələki bir problem görünmür, normal məhsul götürmək olacaq. Bizim rayon Xaçmaz rayonudur, düzdür, duman yağıntı çox oldu. Daha çox gilas, albalı ağaclarına mənfi təsiri oldu. Amma şimal bölgəsinin dağlıq rayonlarındakı bağlara daha çox zərər dəyib. Şaftalı bağlarında bizim rayonda hazırda ən geniş yayılmış xəstəlik yarpaq qıvrılmasıdır. Bu xəstəliyin qarşısını almaq üçün payız və yaz aylarında düzgün dərmanlama (bordo, xorus, skor preparatlarından) aparılmalıdır. Məlum məsələdirki, bəzi preparatlar baha olduğu üçün bağbanlar vaxtında bağlara düzgün dərmanlama işlərini apara bilmirlər. Öz bağımdakı ağaclara görə deyə bilərəmki, indiki vəziyyətlərinə görə fındıq və şaftalıdan normal məhsul götürmək olacaq”.
Astara sakini Elman Şəmszadə isə havaların yağışlı olmasından gileylənib:
“Yağışlı havalar həm canımıza, həm də malımıza ziyan vurur. Çaxan şimşək və yağışdan həyət-bacaya çıxmaq olmur. Ötən günlərdə çaxan şimşək istixanlarada təsir edib. Həm bağdakı ağacların gülləri, həm də ki meyvələrin gülləri yağışdan yuyulub, gedib. Bu yağışlara hazırlıqsız tutulduq”.
Aysel Şahmar