18 nömrəli marşrut üzrə hərəkət edən avtobusların gecikmələrindən narazılıqlar durmadan artır. Sərnişinlər bildirirlər ki, demək olar ki, hər gün iş yerlərinə gedib vaxtında çata bilmirlər. Sürücülərin sözlərinə görə isə interval əslində normaldır, amma şəhərdə hər gün yaşanan tıxac belə problemlərə səbəb olur.
Sərnişinlərin sözlərinə görə hər gün 20-30 dəqiqə avtobus gözləməli olurlar. Nəticədə gedəcəkləri ünvana vaxtında çata bilmirlər.
Qurumlar isə hələ ki, problemin həlli üçün heç bir alternativ variant təqdim etmirlər və ya edə bilmirlər. Bu səbəbdən də çətinliklər günü –gündən artmağa davam edir.
Məsələ ilə bağlı Ednews-a danışan “Xaliq Faiqoğlu" şirkətinin mətbuat katibi Nizam Rzayev bildirdi ki, 18 saylı marşrut xətti Bakı şəhərində ən çox sayda avtobusla ən qısa intervalla işləyən xətlərdən biridir.
“Hazırda xətt üzrə 25 ədəd iritutumlu, Avro-6 standartlı müasir avtobus 4 dəqiqə intervalla xidmət göstərir. Avtobuslardan ikisi isə 4 qapılı və 19 metr ölçülü olmaqla qoşqulu nəqliyyat vasitələridir. Gün ərzində yollardakı sıxlıq və tıxaclar, bəzi istiqamətlərdə hərəkətin məhdudlaşması, eləcə də taksi və digər şəxsi minik vasitələrinin avtobusların hərəkətinə yaratdığı maneələr müəyyən gecikmələrə və interval pozulmalarına səbəb ola bilər. Ümumilikdə 18 saylı xətt üzrə böyük gecikmə halları müşahidə edilmir”.
N.Rzayev hesab edir ki, şəhərdə ictimai nəqliyyat üçün normal şərait yaradılsa, avtobus zolaqları təşkil edilsə heç bir gecikmə halı da olmaz:
“Təəssüf ki, hazırda Bakıda iritutumlu avtobuslar manatlıq taksilərlə, motosikletlərlə və digər şəxsi nəqliyyat vasitələri ilə eyni zolaqda hərəkət etməyə məhkumdur, bu da xidmət keyfiyyərinin aşağı düşməsinə səbəb olur”.
Məsələnin digər tərəfini öyrənmək üçün Bakı Nəqliyyat Agentliyinə göndərdiyimiz sorğu isə cavabsız qaldı. Əfsuslar olsun ki, qurumun mətbuat katibi suallarımızı cavablandırmağı söz versə də, sonda susmağa üstünlük verdi
Oğuz