Azərbaycanda cari ilin may ayınadək “ƏDV geri al” layihəsi çərçivəsində portalda qeydiyyatdan keçmiş istehlakçılara ümumilikdə 425,1 milyon manatdan çox ƏDV məbləği geri qaytarılıb.
Ednews xəbər verir ki, bu barədə İqtisadiyyat Nazirliyi yanında Dövlət Vergi Xidmətinin (DVX) məlumatında bildirilir.
Geri qaytarılan ƏDV-nin 49 milyon manata qədəri təkcə bu ilin yanvar-aprel ayına təsadüf edib.
Alınmış mallara və əldə edilmiş xidmətlərə görə ödəniş nağdsız qaydada olduqda, ödənilmiş ƏDV-nin 17,5%-i, nağd qaydada isə 5%-i istehlakçılara geri qaytarılır.
DVXi tərəfindən ölkədə yeni nəsil nəzarət-kassa aparatlarının (NKA) tətbiqi istiqamətində də işlər davam etdirilir. Hazırda ölkə üzrə tətbiq olunan onlayn NKA-ların sayı 88 mindən çoxdur.
2023-cü ilin 4 ayı ərzində yeni nəsil kassalar vasitəsilə qeydə alınan dövriyyə 6,7 milyard manat olub ki, bu da əvvəlki ilin eyni dövrü ilə müqayisədə 20,1 faiz çoxdur.
