1 İyun Uşaqların Beynəlxalq Müdafiəsi Günüdür.

Bu gün münasibətilə Ednews cəmiyyətdə uşaqlarla çalışan müxtəlif kateqoriya peşə sahibləri arasında sorğu keçirib.

Həmin sorğunu təqdim edirik:

Reyhan Yusifqızı - uşaq yazıçısı

“Təəssüf ki, gələcəyimiz olan uşaqlar üçün indiyə kimi mükəmməl dünya qura bilməmişik. Burada ədalətsizlik də var, bərabərsizlik də... Müharibələr, zəlzələlər... Çox istərdim ki, uşaqlarımız üçün daha gözəl dünya yaradaq. Onların heç bir qayğısı, çətinliyi, kədəri olmasın, yaşıdlarından fərqli böyüdüldüklərini düşünüb məyus olmasınlar. Uşaqlarımıza gülüş, xoşbəxtlik yaraşır. Bütün uşaqların bayramını təbrik edirəm”.

Nuriyyə Quliyeva – klinik psixoloq

“Məncə dünyanın ən məsuliyyətli, eyni zamanda da maraqlı və zövqlü işlərindən biri uşaqlarla çalışmaqdır. Əlbəttə ki, bunun bizim üçün də üstünlükləri var. Uşaqlarla işləmək insanı daha gümrah saxlayır, ruhunu oxşayır, sanki gənc qalmağımıza vəsilə olur. Bunları edən məhz uşaqlardır. Artıq 17 ildir, böyüklərlə yanaşı, uşaqlar və yeniyetmələrlə də işləyirəm. Düşünürəm ki, hər insan uşaqlarla çalışa bilməz, bu, səbr, məsuliyyət tələb edir, onların yaşına, dünyasına enməyi bacarmaq lazımdır. Bütün dünya uşaqlarına sağlamlıq, firavan, sevgi dolu həyat arzu edirəm. Onlara daha sakit və sülhün bərqərar olduğu dünya bəxş etmək istərdik. Bir psixoloq olaraq, şəxsiyyət kimi inkişaf etməyi və özlərini həyatda tapmalarını arzulayıram. Arzu edirəm ki, uşaqlarımız fikirlərini rahatlıqla ifadə etməyi bacarsınlar, hüquqları ilə tanış olub özlərini müdafiə edə bilsinlər”.

Leyla Qarazadə – Lənkəran, Jidi kəndi, ibtidai sinif müəlliməsi

“Bu gün münasibətilə bütün uşaqları və qəlbi uşaq olanları təbrik edirəm. Uşaq qəlbinin gözəlliyi, saflığı, təmizliyini çox şeylə müqayisə edə bilərəm və inanıram ki, hər birində bu məsumiyyət qalib gələcək. Dünyanı uşaq səsi, gülüşü, baxışı olmadan təsəvvür etmək mümkün deyil. Uşaqlar dünyamızı rəngləyən boyalardır, uçan zaman qanadları ilə ətrafımızı gözəlləşdirən kəpənəklərdir. O qanadların gözəlliyini görmək, o kəpənəyə istiqamət vermək isə bizim borcumuzdur. Kəpənək ömrünün həyatımızı bəzədiyinə inananlardanam. O ömür ki, bir gülüşündə, bir baxışında neçə möcüzə gizlidir... Arzu edirəm ki, gələcək dünyamız o baxış və gülüşlərlə bol olsun, hansı ki, təşəkkür ifadə edir... Diləyirəm ki, uşaqların həyatında rolumuz onlara yalnız xoşbəxtlik bəxş etməkdən ibarət olsun. Maksim Qorkidən sitat gətirmək istərdim – “uşaqlar torpağın canlı çiçəkləridir”. Hər zaman o çiçəkləri təravətli saxlamağı, qoxusunun ucsuz-bucaqsız olmağını diləyirəm”.

Şəfa Xeyrulla qızı – Azərbaycan Radiosu, Uşaq və Gənclik redaksiyası, redaktor

“Uşaqların Beynəlxalq Müdafiəsi Günü ilə bağlı onları təbrik edirəm. Hər bir balamıza dünyanın ən şirin neməti olan can sağlığı, xoşbəxt gələcək arzulayıram. Demək olar ki, hər zaman uşaqlarla təmasda olmuşam. Sevindirici haldır ki, ölkəmizin inkişafı uşaqlarımızın təlim-tərbiyəsinə də öz müsbət təsirini göstərir. Ali məktəblərə qəbul imtahanlarında yüksək nəticə göstərənlərin sayı ilbəil artmaqdadır. Uşaqlar gələcək hədəflərinə çatmaq istəyirlərsə, qarşılarına məqsəd qoymalı və bu yolda inam və iradə ilə addımlamalıdırlar. Onlara demək istəyirəm ki, vaxtlarını düzgün dəyərləndirsinlər. Belə olan halda əminəm ki, bütün arzularına çatacaqlar. Əziz balalar, gələcəyiniz parlaq olsun!”  

Ruslan Vəliyev – hüquqşünas

“Uşaqlarımız üçün hüquqi cəmiyyət qurmaq istəyiriksə, qanunlara riayət etməliyik. Uşaq hüquqlarının müdafiəsi üçün gözəl qanunlarımız var. 1998-ci ildə “Uşaq Hüquqları haqqında” Azərbaycan Respublikasının Qanunu qəbul olunub. Bundan başqa, BMT-nin Uşaq Hüquqları Konvensiyasına qoşulmuşuq. Bu qanunlarda bir çox məqamı işıqlandıran müddəalar öz əksini tapıb. Həmin Konvensiyanın 5-ci maddəsində yazılıb ki, hər bir dövlət orqanı və hər kəs uşaq hüquqlarını üstün saymalıdır. Atılan hər bir addımda, görülən hər işdə öncə uşaqların mənafeyi düşünülməlidir. Əgər uşaq hüquqları ilə digər hüquqlar, həmçinin valideynlərin hüquqları ziddiyyət təşkil edirsə, uşaq hüquqları yenə də üstün tutulmalıdır. Valideynlərin, başqalarının hüquqları ikinci plana salına bilər, amma uşaqlarla bağlı məsələlərdə bu, yolverilməzdir. Hər kəs bu normalara riayət etsə, uşaqlar üçün gözəl gələcək, sağlam mühit qura bilərik”.

Sevda Novruzova – pediatr-endokrinoloq

“Uşaqlarımıza ilk növbədə önəmli olan can sağlığı, sağlam həyat arzu edirəm. Uşağın normal inkişafı üçün sağlamlıq ən vacib faktordur. Bütün uşaqların gözəl təhsil almasını arzulayıram. Hazırda elm və iqtisadiyyat inkişaf edib, istərdim ki, uşaqlarımızın gələcəyin alimi, savadlı mütəxəssisi kimi dünyanın dörd bir yanından səsini eşidək”.

Sultan Abbasbəyli – animator

“Ölkəmizdə uşaqlar üçün çoxlu cizgi filmləri çəkilməlidir, öz dilimizdə milli-mənəvi dəyərlərimizi əks etdirən animasiyaların sayı artmalıdır. Yox səviyyəsində olmasa da, üstünlük serial layihələrinə verilməlidir. Yaxşı olardı ki, uşaqlarımız üçün yerli cizgi filmləri çəkilərdi, onlar da qarşıdakı üç ay boyunca yay tətillərini bu cizgi filmlərinə baxaraq səmərəli keçirərdilər. Onu da anons verim ki, hazırda yeni layihə üzərində işləyirik, maraqlı bir animasiya serialı çəkməyə başlamışıq, ölkə üçün bu sahədə gözəl bir ilk olacaq. Məktəbəqədər uşaqlar  və ibtidai sinif şagirdləri üçün həm maarifləndirici, həm də əyləncəli bir cizgi filmi serialı ərsəyə gətirəcəyik. Düşünürəm ki, insanın dünya görüşü və düşüncə tərzinin formalaşması üçün uşaqlıq dövründən etibarən kitablar qədər cizgi filmləri də rol oyanayır”.

Törə Zeynallı