Hər tədris ilinin sonuna yaxın universitetlərdə yay imtahan sessiyası dövründə ənənəvi “şortik” problemi ilə qarşılaşırıq.
Bu dəfə isə oxşar hadisə AzərbaycanTexniki Universitetində yaşanıb. İmtahana “şortik” və çəkələklə gələn tələbəni mühafizəçi prorektorun şifahi göstərişi ilə 30 dəqiqə qapıda gözlədib.
İnsidentlə bağlı universitetin mətbuat xidmətindən bildirilib ki, təhsil ocağında geyim qaydaları ilə əlaqəli hər hansı məhdudiyyət yoxdur.
Universitet geyimlə bağlı qadağanın olmadığını bildirsə də, nəticədə tələbə gözlədilərək imtahanın başlamasına yalnız dəqiqələr qalmış içəri buraxılıb.
Bəs belə hallarla üzləşən tələbə haqqını tələb etmək üçün hara şikayət edə bilər?
Məsələyə münasibət bildirən təhsil üzrə ekspert Elşən Qafarov Ednews-a açıqlamasında bildirib ki, dövlət mülkiyyətində olan təhsil müəssisələrindən başqa, digər özəl təhsil ocaqlarında təhsil alanların geyim forması həmin müəssisənin daxili nizamnaməsi ilə müəyyən edilir.
“Hansı universitetin nizamnaməsində konkret geyim qaydası göstərilibsə, həmin qaydalara riayət etmək hər bir tələbənin borcudur. Əgər nizamnamədə belə bir qayda nəzərdə tutulmayıbsa, istər prorektor, rektor, istər də müəllim və ya mühafizəçi olsun - tələbənin geyiminə qarışa bilməz. Tələbəni universitetə buraxmamağa, imtahandan xaric etməyə kimsənin səlahiyyəti yoxdur. Təhsil müəssisəsi ilk növbədə öz nizamnaməsini tələbənin diqqətinə çatdırmalıdır. Yalnız bundan sonra tələbədən müvafiq qaydalara əməl etməsi tələb oluna bilər. Hər hansı tələbə şifahi göstərişlə bu cür qanunsuzluğa məruz qalırsa, ali təhsil müəssisəsinin yerləşdiyi rayon prokurorluğuna müraciət edib şikayət edə bilər”.
Törə Zeynal
