“Birazdan Azərbaycanın Meksidakı səfirini onların xarici işlər nazirliyinə çağırıb, Azərbaycandakı kaktuslara qarşı qeyri-humanist davranışa görə nota verib, narahatlıqlarını bildirsələr heç təəcüblənmərəm”.
Ednews xəbər verir ki, bunu televiziya aparıcısı və prodüser Emin Əfəndi teleqram hesabında qeyd edib.
Prodüser Dənizkənarı Bulvarda kaktusların üzərinə yazılar yazılması ilə bağlı yayılan video ilə bağlı tənqidi fikirlər yazıb:
“Ay bala, nə vermisiz Bakı Bulvarındakı dekorativ kaktuslara ki, ala bilmirsiz? Düşünürəm ki, artıq bu bir araşdırma mövzusuna çevrilməlidir.
Bulvarda o bədbəxt, yerindən yurdundan uzaq düşən kaktusları mən də görmüşəm. Əsəbləşib “su içmək” əvəzinə kaktusun yarpağına “Vasmoy Yek” yazmaq istəsəm, 7 hərf üçün yer tapa bilmərəm. Bütün boş yerlər tutulub.
Bəlkə şəhərimizdə “kaktus yarpaqlarını yazanlar” dərnəyinin nəznində xüsusi bir yer ayırmaq lazımdır, ki insanlar orada yığışıb performanslarını göstərib, özü kimiləri ilə tanış olsunlar? Mən zoopark və sirki nəzərdə tutmuram. Çünki inanmıram ki, o obyektlərin daimi sakinlərin bu işə böyük həvəsi ola. Mütləq bir şey fikirləşmək lazımdır”.
