Bu gün, iyulun 18-i Azərbaycan Respublikasının Minatəmizləmə Agentliyi təsis olunmasının 25-ci ildönümüdür.
Ednews xəbər verir ki, bu münasibətlə Beynəlxalq Avrasiya Mətbuat Fondunun prezidenti, Minatəmizləmə Agentliyi yanında İctimai Şuranın sədri Umud Mirzəyev ANAMA-nin İdarə Heyətinin sədri Vüqar Süleymanov və təşkilatın kollektivini səmimi qəlblə təbrik edib.
U.Mirəzyev ANAMA ilə BAMF-ın uğurlu əməkdaşlığından söz açıb. Onun sözlərinə görə, BAMF demək olar ki, Minatəmizləmə Agentliyi yaranan ilk gündən onunla əməkdaşlıq edir:
“BAMF rəhbəri olaraq ANAMA ilə bir çox uğurlu layihələr həyata keçirmişik və bu gün də keçiririk. BAMF 2000-ci ilin əvvəlindən BMT-in İnkişaf Proqramının dəstəyi ilə həyata keçirilən Azərbaycanda Mina Təhlükəsizliyi ilə mübarizə proqramına qoşulmuşdur. Hazırda BAMF Azərbaycan Respublikasının Minatəmizləmə Agentliyinin (ANAMA) əsas partnyorlarından biridir. ANAMA-ın dəstəyi ilə Partlayıcı Sursatların Təhlükəsinə dair Maarifləndirmə (PSTM), “Azərbaycan Respublikasının Minatəmizləmə Agentliyinin (ANAMA) imkanlarını artırmaqla məcburi köçkünlərin təhlükəsiz qayıdışına dəstək” kimi layihələri də uğurla həyata keçirir. Hazırda BAMF ANAMA-nın dəstəyi və tapşırığı əsasında UNDP, UNHCR və ABŞ Dövlət Departamentinin dəstəyi ilə birgə layihələr icra etməkdədir.
U.Mirzəyev ANAMA-nın gördüyü işlərdən, fəaliyyətindən də danışıb:
“ANAMA ilə Azərbaycanın 11 min hektar ərazisinin təmizlənməsində BAMF olaraq iştirak etmişik. 20 ildən çoxdur fəaliyyət göstərən BAMF-ın İcma Mina Aksiyası Komandası indiyədək 1262 ədəd tank əleyhinə mina, 1789 ədəd piyada əleyhinə mina, 13984 ədəd isə Partlamamış hərbi sursat (PHS) aşkarlayaraq məhv etmiş və ümumilikdə 11 118.09 ha ərazini təmizləmişdir. Bu istiqamətdə ANAMA ilə fəaliyyətlərimiz olub. Bu gün də Qarabağ regionunda böyük layihələri icra edirik. Bu ilin iyun ayından isə Avropa İttifaqı (Aİ) və ABŞ Dövlət Departamenti tərəfindən maliyyələşdirilən və Birləşmiş Millətlər Təşkilatının İnkişaf Proqramının (BMTİP) ANAMA, Beynəlxalq Avrasiya Mətbuat Fondu (BAMF) və Minalar üzrə Məsləhət Qrupu (MAG) ilə birgə tərəfdaşlıqla həyata keçirdiyi “Azərbaycan Respublikasının Minatəmizləmə Agentliyinin (ANAMA) imkanlarını artırmaqla məcburi köçkünlərin təhlükəsiz qayıdışına dəstək” layihəsinin icrasına başlanılıb. Mina Aksiyası Qrupu (MAQ) ilə qadın komandasının formalaşdırılması layihəsi də təqdirə layiq işlərdəndir. Ümumilikdə 16 ay davam edəcək layihənin əsas məqsədi ANAMA-nın bazasını və potensialını artırmaqla Azərbaycanda aparılan minatəmizləmə əməliyyatlarına dəstək vermək və mina təhlükəsi ilə mübarizədə gender bərabərliyinin əhəmiyyətini diqqətə çatdırmaqdır. Bütün bu fəaliyyətlər ANAMA-nın dəstəyi ilə həyata keçirilir.
ANAMA minalardan zərər çəkənlərin ehtiyaclarının öyrənilməsində, minaların sosial-iqtisadi mənfi təsirinin tədqiqatında, maarifləndirmədə və minatəmizləmə fəaliyyətinin həyata keçirilməsində əhəmiyyətli işlər yerinə yetirib. İşini şərəflə və qürurla həyata keçirən ANAMA “Böyük Qayıdışa” inamla addımlayır. Qarabağımıza təhlükəsiz və sağlam qayıdışın təmin edilməsində əlindən gələni əsirgəməyən agentlik vətəndaşları məsuliyyətli və sayıq olmağa, səylərimizi birləşdirərək işğaldan azad edilmiş ərazilərimizdə təhlükəsiz, dayanıqlı və sağlam yaşayış mühiti yaratmağa çağırır”.
Sonda Umud Mirzəyev ANAMA rəhbərliyini və kollektivini təbrik edib:
“Bu gün ölkə rəhbərliyi tərəfindən, cəmiyyət, sıravi vətəndaşlar, uzun illər yurduna-yuvasına həsrət qalmış insanlar, bütün qurumların diqqəti ANAMA-nın nəzərindədir. Onun gördüyü layihələr, apardığı işlər Azərbaycan üçün olduqca mühümdür. Minaların təmizlənməsi, topraqların, əkin-biçin sahələrinin, yaşayış yerlərinin təmizlənməsi və insanlarımızın təhlükəsiz geri dönüş məsələsi ANAMA-nın əsas missiyalarındandır. ANAMA özünün peşəkar komandası, güclü rəhbərliyi ilə bu işlərin yerinə yetirilməsi üçün gecə-gündüz çalışır. Biz də Beynəlxalq Avrasiya Mətbuat Fondu olaraq ANAMA-ya və onun bütün kollektivinə, onu sevənlərə təbrik mesajlarımızı çatdırır, işlərində böyük uğurlar arzuluyuruq”.