"Şuşa Qlobal Media Forumunun əhəmiyyətindən danışarkən, fikrimcə, məsələyə 3 aspektdən yanaşmaq olar. İlk olaraq, Qlobal Media Forumunun gündəmə gətirdiyi mövzular, ikincisi, Qlobal Media Forumunda təmsil olunan insanlar, ölkələr, üçünücüsü isə Forumun keçirildiyi məkan baxımından çox böyük əhəmiyyətə malikdir". Ednews xəbər verir ki, bunu SİA-ya açıqlamasında Azərbaycan Mətbuat Şurasının sədr müavini, Beynəlxalq Avrasiya Mətbuat Fondunun (BAMF) sədri Umud Rəhimoğlu deyib.
"Forumda bu gün yeni medianın, süni intellektin, jurnalist təhlükəsizliyinin, peşəkarlığının nə qədər vacib olduğu kimi sadaladığım mövzularla bağlı həm uğurlar, həm də problemlər yerli və beynəlxalq jurnalistlər tərəfindən işıqlandırıldı. Qeyd edim ki, bu Forumda 50-yə yaxın ölkədən 150-dən çox xarici jurnalist iştirak edib. Bu miqyasda jurnalistin bir yerə toplanması Şuşada ilk dəfə baş verirdi və bunun da çox böyük əhəmiyyəti var idi. Artıq burada bu qədər insanın şəbəkəsi yarandı, münasibətlər formalaşdı, ünsiyyətlər quruldu, Azərbaycanı sevən jurnalistlər arasında formal da olsa bir şəbəkə formalaşdı, şəbəkənin zəmini qoyuldu.
Üçüncü məsələ isə bu Forumun Şuşada keçirilməsinin əhəmiyyətidir. Cənab Prezidentin çıxışı, verdiyi mesajlar, birbaşa jurnalistlərlə ünsiyyətdə olması gündəmi zəbt edən məsələ idi. Çıxışdan sonra qonaqlar, iştirakçıların böyük əksəriyyəti Prezidentin verdiyi mesajların təsirində idi. Şuşa bizim mədəniyyət paytaxtımız idi və artıq 150-yə yaxın insanın hər biri Şuşanın Azərbaycan üçün nə qədər böyük əhəmiyyət kəsb etdiyinin fərqinə vardılar. Bundan əlavə, bu insanlar Füzulidən avtobusla Şuşaya gedərkən dağıdılmış, viran olmuş torpaqlarımızı, qəsəbələrimizi öz gözləri ilə gördülər. Bütün bunların hamısı əlbəttə ki, təsirsiz qalmadı. Prezident İlham Əliyevin çıxışı zamanı da qeyd edildi ki, bu Forum birinci Forumdur. Bu isə o deməkdir ki, bu Forum Azərbaycanda davamlı olaraq keçirilə biləcək qlobal bir tədbir ola bilər. Bu da əhəmiyyətli məqamlardan biridir.
Hesab edirəm ki, ölkəmizin tanıdılması, onun problemlərinin ortaya qoyulması, Qarabağ uğrunda gedən savaşın belə mərhələsində bu cür Forumların keçirilməsinə ehtiyac var idi. Buna görə də, Forumun əhəmiyyətini yüksək qiymətləndirirəm", - Umud Rəhimoğlu qeyd edib.
