“Prezident İlham Əliyev Şuşada “Euronews” televiziya kanalına verdiyi müsahibədə sülh prosesilə bağlı çox vacib məqamlara aydınlıq gətirdi”.
Bu fikirləri deputat Könül Nurullayeva Ednews-a açıqlaması zamanı deyib. O, qeyd edib ki, dövlət başçımız ilk olaraq 2020-ci il noyabrın 10-da imzalanmış sənədin əsl mahiyyətini bir daha bəyan etdi və bildirdi ki, əslində bu sənəd Ermənistanın kapitulyasiya aktı idi.
“Məhz bu səbəbdən rəsmi Bakı Ermənistanla münaqişənin yekun həll variantını tapmaq məqsədilə müəyyən təşəbbüslərlə çıxış edib. Beləliklə, əsas prinsiplər müəyyənləşdi. Bu gün sülh danışıqları məhz həmin prinsiplər əsasında aparılır. Yəni, Prezident İlham Əliyevin də söylədiyi kimi, Azərbaycan 30 illik işğaldan əziyyət çəkmiş və ədaləti güc hesabına bərpa etmiş ölkə olaraq yeni sülh prosesinin müəllifidir.
Rəsmi Bakı Avropa İttifaqı Şurasının Prezidentinin koordinasiyası ilə təşkil olunan Brüssel görüşlərini həssas məsələlərə toxunmaq imkanı hesab edir. Təbii ki, dövlət başçımızın verdiyi əsas mesajlardan biri sülhün prinsipial şərtləri ilə bağlı idi. “Biz Ermənistan tərəfindən konstruktiv yanaşma görsək və əgər onlar ərazi bütövlüyümüzü mübahisələndirən bütün iddialarını kənara qoysalar, onda tezliklə sülh variantını tapa bilərik” deyən Azərbaycan Prezidenti sülhün yubanmasının səbəbini də göstərmiş oldu.
Yəni, bu gün sülh həm də Ermənistanın bunu istəməsindən asılıdır. Çünki bizim Ermənistana qarşı hər hansı bir ərazi iddialarımız yoxdur. Biz onların da Azərbaycana qarşı ərazi iddialarının olmamasını istəyirik.
Vasitəçilərə gəlincə, Prezident İlham Əliyevin söylədiyi kimi, Azərbaycan üçün vacib olan nəticədir. “Prosesin kimin tərəfindən aparılacağı və ya prosesi kimin müəyyən dərəcədə inhisara götürəcəyi bizim üçün böyük fərq etmir. Nəticəyə gəlmək vacibdir. Sülh sazişi ilə nəticələnəcək təşəbbüsü irəli sürən hər hansı tərəfi biz dəstəkləyəcəyik”, - deyə ölkə baçısı Azərbaycanın sülh platformaları ilə bağlı mövqeyini bir daha bəyan etmiş oldu.
Dövlət başçımız həmçinin Ermənistanın “humanitar fəlakət” iddialarının əsassız olduğunu bir daha bəyan etdi.
Qeyd etdi ki, ikinci Qarabağ müharibəsinin bitməsindən təxminən iki il sonra Laçın dəhlizi adlandırılan yol işğal vaxtında işləyən qaydada fəaliyyətini hər zaman davam etdirib. Yəni, Ermənistanla olan sərhəddə hərəkət etmək azadlığı bloklanmayıb. Sərhəd-keçid məntəqəsinin qurulması isə Azərbaycanın legitim hüququdur. Aprelin 23-dən etibarən Qarabağın 2 mindən artıq sakini Ermənistana asan şəkildə gedib-gəlib.
Prezident İlham Əliyev həmçinin Qarabağda yaşayan ermənilərə seçim hüququnun veriləcəyini bildirib. Yəni, ölkəmizdəki digər milli azlıqlar kimi etnik ermənilər də Azərbaycan vətəndaşları olaraq yaşayacaqlarına və ya Azərbaycanı tərk edəcəklərinə dair seçim etməlidirlər. Bu vacib mesajların nüfuzlu telekanal vasitəsilə dünya ictimaiyyətinə çatdırılması olduqca vacibdir. Azərbaycan Prezidentinə ünvanlanan suallar 44 günlük müharibədən sonra Cənubi Qafqaz regionundakı vəziyyəti və sülhün yubanmasının əsl səbəbini daha dərindən anlamağa imkan verir”.
Aynurə İsmayıl
