Xəbər verdiyimiz kimi, sentyabrın 10-u Azərbaycan Ordusunun hərbi qulluqçusu Eminov Xəyyam Mahal oğlu Ağdam rayonu ərazisində bölmələrimizin təminat yolunda qeyri-qanuni erməni silahlı dəstələrinin kəşfiyyat-diversiya qrupu tərəfindən təxribat məqsədilə basdırılmış piyada əleyhinə minaya düşərək xəsarət alıb.
Son dövrlərdə Qarabağ iqtisadi rayonundakı Ermənistan silahlı qüvvələrinin qalıqları və qeyri-qanuni erməni silahlı dəstələrinin ərazilərimizə kütləvi şəkildə yeni minalar döşəməsi, bununla da Azərbaycana qarşı mina terroru siyasətini davam etdirməsi müşahidə edilməkdədir.
Bu barədə Ednews-a Beynəlxalq Avrasiya Mətbuat Fondunun prezidenti, ANAMA yanında İctimai Şuranın sədri Umud Mirzəyev bildirdi ki, erməni vandalları bu ərazilərin hər qarışını minalayıb, piyada əleyhinə minalar, kassetli minalar döşənib. Elə olur ki, 1 kvadrat metr ərazidən 10-15 mina təmizlənir. Erməni terroruna son qoyulmalıdır:
“Ölkəmizdə bu sahədə maarifləndirici işlər də görülür. Beynəlxalq təşkilatlar tərəfindən bir sıra proqramlar həyata keçirir. ANAMA bu istiqamətdə xüsusi işlər aparır, eyni zamanda xüsusi diqqət ayırır. Bu istiqamətdə BMT-nin Qaçqılanlar Üzrə Ali Komissarlığı, BMT-nin Uşaq Fondu, İnkişaf Prqoramı bir sıra layihələrə həm dəstək göstərir, həm də icra edirlər. Bununla yanaşı hadisələr də baş verir. Ən əsas və ən birinci səbəbi, Azərbaycan ərazilərinin kütləvi şəkildə çirkləndirilməsidir. Ona görə də Azərbaycan üçün bu ağrılı problemə beynəlxalq təşkilatları, qurumları məsələyə ciddi diqqət ayırmasıdır.
Mən burada dünyanın supergüc dövlətlərinə səslənirəm ki, bu terrora son qoyulmalıdır. Qarabağda məskunlaşan bir qrup terrora dəstək dayandırılmalıdır. Qarabağın sərvətlərini talayan, uzun illər torpaqlarımızdan narkotik ticarəti üçün istifadə etmiş terrorçu qüvvələr həmin bu problemləri yaradıblar. Mən dünyanın aparıcı təşkilatlarına səslənirəm ki, Azərbaycana dəstək olsunlar. BAMF 20 ildən artıqdır ki, ANAMA ilə tərəfdaşlıq edərək “Mina təhlükəsi ilə mübarizə proqramı”nda fəaliyyət göstərir. Biz hər gün əməkdaşlarımızla söhbətlər apararaq təhlükəsizlik qaydalarına ciddi şəkildə əməl etmələrini tapşırırıq”.
U.Mirzəyevin sözlərinə görə, hər birimiz 44 günlük müharibədə olduğu kimi bir olmalıyıq və hər kəsi mina təhlükəsindən qorunmağa səsləməliyik:
“Qarabağda ərazilərin geniş miqyasda minalanması əslində region üçün böyük fəlakət, ciddi ekoloji problem sayılır. Qarabağ və onun ətrafında olan bölgələrdə genişmiqyaslı dağıntıların aparılması ilə bərabər nizamsız şəkildə minaların basdırılması hazırda Azərbaycan üçün böyük çətinliklər yaradır. Minalı ərazilərin xəritələrinin üzdə olmaması Bakı üçün regionda infrastruktur layihələrinin həyata keçirilməsindən tutmuş, məcburi köçkünlərin öz dədə-baba torpaqlarına qayıtmalarına qədər görməli olduğu vacib tədbirlərdə ciddi əngəllər yaradır. Amma bu, o demək deyil ki, Azərbaycan xalqı öz yurdlarında yaşamayacaq. Bu gün Qarabağa “Böyük qayıdış” həyata keçirilir və bu sürətlə baş verir”.
Qeyd edək ki, hərbi qulluqçumuz dərhal hərbi tibb müəssisəsinə təxliyə edilib. Onun həyatı üçün təhlükə yoxdur.
Oğuz
