Xəbər verdiyimiz kimi, Naxçıvan Muxtar Respublikasının Şərur rayonunun Mahmudkənd kəndində yas mərasimləri zamanı gələnlərə yemək verilməsi qadağan edilib. Sözügedən qərar kənd ağsaqqallarının iştirakı ilə keçirilən yığıncaqda qəbul edilib.
Bu qadağa Bakıya da aid edilə bilərmi? Ümumiyyətlə, yas mərasimlərində aşırı yemək, ehsan vermək İslamda nə dərəcədə düzgündür?
Mövzu ilə bağlı Ednews-a şərh bildirən ilahiyyatçı Tural İrfan bildirdi ki, ehsan insanın imkanı daxilində verilməlidir. Borcla, kreditlə, sələmlə, faizlə, nisyə ehsan vermək doğru deyil. Yas sahibinə yaxınları, digər insanlar dəftər - kitabsız maddi, mənəvi dəstək olmalıdır. Onun qapısına yeməyə yox, dərdinə şərik olmağa getməlidir. Yas sahibinə dəstək olmaq əvəzinə bizdə əksinə onu daha da çətinə salır insanlar. Ümumiyyətlə 7,40, cümə axşamı, il məclisləri təxirə salınmalıdır:
“Təmtəraqlı yas məclisləri və israfla müşaiyət olunan ehsan süfrələrinin doğru olmadığı haqda illərlə yazırıq, deyirik, maarifləndirmə aparırıq. Bu cür məclislər yas sahibinin maddi çətinliyə tuş gəlməsinə, digər sosial problemlərə aparıb çıxarır. Bahalı və böyük qəbir daşları, təmtəraqlı ehsan süfrələri həm dini cəhətdən, həm də ənənələrimiz baxımından məqbul deyil.
Bu gün oxudum ki, Şərur rayonunun Mahmudkənd kəndində ağsaqqallar qərar qəbul edib ki, yas süfrələri yığcamlaşdırılsın. Alqışlayıram. O ağsaqqallar demək əsl ağsaqqaldırlar. Müasirliyi, gedişatı, tələbləri, sosial vəziyyəti, dinimizi dərk edən insanlardırlar. Ümid edək ki digər bölgələrdə də bu təkrar olunsun. Ölü yerində çatlayana kimi aşdan, dolmadan yeyib salavat oxumağa nəfəs yeri saxlamadan halvadan tıxamaq heç də ölüyə, ölü sahibinə hörmət demək deyil. Yas yeri, hüzn məclisi qonaqlıqdan, toydan fərqlənməlidir. Yas məclisində gedib yemək gözləmək abırsızqlıdır. Əksinə, qonaqlar yas sahibinə yemək aparmalı, onu və başı yasa qarışan ailəsini təmin etməlidir”.
T.İrfan qeyd etdi ki, 7, 40 kimi tədbirləri, qonaqlıqları da ümumiyyətlə ləğv etmək lazımdır:
“Peyğəmbər əsla belə cəfəng işlər görməyib. Nə də ölmüş səhabəsinin ailəsinə gedib oturub aş, halva gözləməyib. Yaxınları vəfat edəndə tapşırıb ki, onların başı qarışıb, odur ki, sizlər yas yerinə yemək, ərzaq aparıb dəstək olun. İslama etiqad edən, özünü müsəlman sayan buna əməl etməlidir”.
Oğuz
