Ətrafımızda bürclərə inanan yetərincə insan var. Bəzən etdiyimiz hər hərəkət, dediyimiz hər söz bürclərlə əlaqələndirilir. Hətta bir insanla ilk tanışlıq zamanı ona verilən ilk sual hansı bürcə mənsub olması haqqında olur. Ailə münasibətləri pozulan zaman “bu bürclərin yola getməyəcəyi əvvəldən bəlli idi” deyən də olur. 

Bəs həqiqətən bürclər bizim xarakterimizə təsir edirmi? Həmçinin qeyd etmək vacibdir ki, tarixdə bir çox məşhur insanlar da bürclərə inanıb. 

Niyə cəmiyyətimizdə insanlar bürclərə bu qədər inanır? Bürclərə görə evlənir, boşanır, ayrılır. 

Bu barədə Ednews-a sosioloq Lalə Mehralı münasibət bildirdi. Onun sözlərinə görə, bu günün planlaşdırmayan, davranışlarını hesablamayan və buna cəhd etməyən insanların özünü aldatma bəhanəsidir: 

“Bürclər gün ərzində bizi gözləyən uğurlu və uğursuz hadisələr barədə məlumat verə bilər, lakin o məlumatları peşəkar yazarsa. Onlar gün boyu bunun analizini aparıb, ulduzların hərəkətini izləyib, nəticənin nə olacağı təxmin edərək yazılır. Yəni adi təxminlərdir. Bütün həyatını bürclərə, ulduzlara görə qurmaq aludəçiliyin bir növüdür. Ulduz falı icazə verməsə işə getməyən, bürcündə məsləhət görülmürsə münasibətə girməyən insanlar var. Addım atanda da bürclərin məsləhəti ilə atırlar. İnsan özü öz hərəkətinin nəticəsini analiz edə biləcək dərrakədədir, işə, münasibətə başlamaq, evlənmək üçün bürclərin yol göstərməsini gözləmək öz zəkanı, analiz qabiliyyətini, düşüncələrini təhqir etmək deməkdir. Bürclərə, ulduz falına əyləncə kimi baxmaq olar, bəzən məsləhətlərin kim tərəfindən yazıldığına diqqət etmək şərti ilə əməl etmək də olar, lakin bütün həyatını buna görə planlamaq normal deyil”.

Oğuz