İctimaiyyət hər bir təşkilatın fəaliyyəti barədə indormasiyanı məhz medianın köməyilə ala bilir. KİV-lər isə daim görülən işlər, həyata keçirilən islahatlar, baş verən yeniliklər barədə məlumat, xəbər axtarışındadır. Bu zaman IV hakimiyyət funksiyasını yerinə yetirən mətbuat əldə edə bildiyi xəbərləri ictimaiyyətin diqqətinə çatdırmaqla vasitəçi rolunu oynayır. Amma xəbər axtarışında olan jurnaistlər bəzən maneələrlə üzləşir, hansısa sədləri keçməli olurlar. Bir sıra hallarda jurnalistlərə problem yaradanlar sırasında dövlət qurumlarının mətbuatla əlaqələndirici şəxləri, mətbuat katibləri və ya əməkdaşları olurlar.
Hansı orqanların mətbuat katibləri daha operativdir?
Ednews bu mövzuda baş redaktorlar, jurnalistlər arasında sorğu keçirib.
Yenisabah.az saytının baş redaktoru Seymur Verdizadə:
"Mətbuat xidmətləri ilə birbaşa mən özüm əlaqə saxlamıram. Amma əməkdaşlarımız gündəmə uyğun olaraq, bütün dövlət qurumlarının nümayəndələri, xüsusilə mətbuat katibləri ilə sıx əməkdaşlqı edirlər. Onların rəyinə əsaslanıb deyə bilərəm ki, Ekologiya və Təbii Sərvətlər Nazirliyinin, DİN-in, ASAN Xidmətin, Qaşqınların və Məcburi Köçkünlərin İşləri üzrə Dövlət Komitəsinin, "Azərsu"nun mətbuat katibləri öz vəzifə borclarını məsuliyyətlə yerinə yetirirlər. Təəssüf ki, eyni sözləri Səhiyyə Nazirliyinin, Dövlət Turizm Agentliyinin, AYDA-nın mətbuat katibləri haqda söyləyə bilmərik".
Jurnalist Ekspert Mərkəzinin sədri Ceyhun Musaoğlu:
Mətbuat xidmətləri mənim əziz həmkarlarım, əksəriyyəti də sevimli dostlarımdır. Mən də 5 il dövlət qurumunun mətbuat katibi olmuşam. Mətbuat katibi qurumun bir başa birinci şəxsinə tabedir, onun funksiyası təmsil etdiyi qurumun təbbi ki, ancaq yaxşı işlərini təqdim və təbliğ etmək, pis işlərini təkzib etmək, yaxud bu tipli informasiyanın düzəlişlərə ehtiyacı olduğunu açıqlamaqdır. Jurnalistikada keyfiyyətli və aşağı keyfiyyətə malik, yaxud keyfiyyətsiz informasiya anlayışı var. Mətbuat katibi mediaya lazım olan və keyfiyyətli informasiyanı əksər hallarda yaya bilməz. Media tənqidə tuş gələn informasiyaya keyfiyyətli deyir. Mətbuat katibi tənqidə məruz qalacaq informasiyanı niyə yaysın axı? Bu mənada mətbuat katiblərindən ummaq doğru deyil. Başqa tərəfdən sorğulara açıq olan mətbuat katibliyi anlayışı da var. Hər hansı qurum barəsində neqativ informasiyaya aydınlıq gətirmək lazım olanda öncə mətbuat katibləri ilə əlaqə saxlayırıq. Əlbəttə ki, onların ilk cavabı ya belə olur: "Araşdırıb cavab verərəm, ya da deyirlər ki, yalan məlumatdır. Belə cavablar medianın xəbər siyasətində kasadlıq yaradır. Bir sozlə, mətbuat katibləri yaxşı, peşəkar, yüksək mədəniyyətə, sevgiyə sahib həmkarlarımızdır, sadəcə onların funksiyası medianın istəyi ilə tərs mütənasibdir.
İdman teleaparıcısı Ceyhun Rzayev:
“"Zirə" klubunun mətbuat katibi Elmar Abdullazadə və "Sabah" klubunun mətbuat katibi Elnur Həmidovun işlərində çox yaxşıdırlar. Xüsusi narazı olduğum biri isə yoxdu”.
Medianews.az saytının baş redaktoru Xəyalə Rəis:
“Dövlət orqanlarının mətbuat xidmətlərinin yaxşı işləməsi bizim işimizi bir qədər asanlaşdırır. Onları xidmətlərinin fəaliyyətində operativlik olarsa, təbii ki, dövlət qurumlarının fəaliyyəti ilə yanaşı, həm də bizim işimiz daha rahat olar. Təəssüf ki, dövlət qurumlarımızın mətbuat xidmətlərinin hamısı media ilə eyni səviyyədə çalışmır.
Səhiyyə nazirliyinə müxtəlif problemlərlə bağlı müraciət etsəm də heç zaman tam bir cavab almamışam. Ya natamam cavab almışam, ya da məsələni boyunlarından ataraq TƏBİB- ə yönəldiblər.
TƏBİB-in məsul olduğu işlərlə bağlı isə istər gecə istər gündüz əvvəl Zamirə Ədilova, daha sonra Hicranə Əlişqızı yerindəcə məsələni aydınlaşdıraraq həll edib.
Əmək və Əhalinin Sosial Müdafiəsi Nazirliyində yanında Dövlət Tibbi-Sosial Ekspertiza və Reabilitasiya Agentliyinin İctimaiyyətlə əlaqələr şöbəsinin müdiri Tural Qurbanov da operativ işləyən mətbuat xidmətlərindəndir. Bizə müraciət edən vətəndaşların problemlərini anındaca aydınlaşdıraraq yoluna qoyub.
“ASAN xidmət”-in mətbuat katibi Elnur Niftəliyev də operativ çalışır və ən əsası mətbuatın ən yaxın dostudur. Onunla bərabər Turizm Agentliyindən Orxan Bədəlov, Fikrət Təhməzov da operativ şəkildə çalışırlar. “Azərxalça” ASC-də mətbuat katibi Xatuna Abdullayeva da mətbuatla sıx əlaqədə olan, daim onların suallarını operativ şəkildə cavablandıran mətbuat xidməti rəhbərlərindəndir.
Özüm Sənətşünas, Teatrşünas olsam da və uzun müddət bu sahədə yazan bir media nümayəndəsi olaraq Mədəniyyət nazirliyi ilə ulduzlarımız barışmır. Onların öz siyahıları var və daim onlarla davamlı əməkdaşlıq edirlər. Bu əvvəlki nazirin dövründə də belə idi, indi də. Nazirlər dəyişir amma daxildə çalışan sturkların iş prisinpində bir dəyişiklik sezilmir”.
"Aran" qəzetinin redaktoru Məhsəti Musa:
"Aran" bölgə mətbuatı olduğu üçün təbii ki, bizə lazım olan məlumatları aidiyyəti təşkilatların özündən rahatlıqla əldə edə bilirik. Bundan əlavə, müəyyən məlumatlar lazım olduqda Daxili İşlər Nazirliyinin Bərdə Regional Qrupu ilə çox rahat şəkildə əlaqə yarada, lazımi informasiyanı ala bilirik. Azərsu ilə bağlı sorğularımıza cavab olaraq ötür-ötürdən başqa heç nə əldə etməmişik.
Qarabağ Regional Təhsil İdarəsindən də heç bir məlumat əldə edə bilmirik.”
Teleqraf.com-un redaktoru Mənsur Rəğbətoğlu:
“Cəmi bir dəfə dövlət qurumunun mətbuat xidmətinin rəhbərinə zəng etmişəm. Onda da elə kədərli tonda soruşdu ki, nə istəyirsən? Qayıtdım ki, heç nə. Yay günü, bürkü, hərə bir tərəfdə süst düşüb... O da, mən də hiss elədik ki, nə sual, nə də cavab ikimizə maraqlıdır. Sağollaşdıq, bir də danışmadıq”.
Oğuz
