Bu gün “Ümumdünya Yaxşılıq etmə Günü”dür. Yaxşılıq etmək, xeyirxah uşlər görmək insan ömürünü uzadan və onu xoşbəxt hiss etdirən əməllərdəndir. Atalar yaxşı deyib, savab gör, hər zaman yaxşılıq eylə.

Ednews bu özəl günlə bağlı ictimaiyyət arasında sorğu keçirib. Bu günə kimi hansı yaxşılıqları etmisiniz? Cavabları təqdim edirik:

Deputat Razi Nurullayev: 

“Hər gün yaxşılıq edirəm. Birincisi, deputat mandatımdan, səlahiyyətimdən istifadə edərək vətəndaşların problemlərini demək olar ki, hər gün bir neçə nəfərin problemini həll edirəm. Bu ya əlilliklə bağlı olur, ya da sosial yardımla bağlı. Yaxud da xəstəxanaya gətirilən bir şəxsə kömək etmək olur. Elə olub ki, insanların evlərinin tikintisində də yardım etmişəm. Təbii ki, bunu mən başqa insanlara elətdirmişəm, öz maddi imkanım yoxdu ki, kiməsə belə kömək edəm. Ən azından bu günə qədər 17-18 insanın evlərinin tikilməsi üçün vəsilə olmuşam”. 

Politoloq Tural Əliyev:

“Yaxşılıq et, at dənizə. Balıq bilməsə, Xaliq bilər" nə gözəl sözdür, deyilmi?! Dünya yaranandan həyatın fəlsəfəsi xeyir və şər arasında mübarizəyə söykənir, xeyirin "məhsulu" yaxşılıqdır, şərin isə pislikdir, İnsanın daxilində ikisi də var, sadəcə kim hara meyil göstərirsə, o tərəf daha çox inkişaf edir. Yəni ikisi də insanın öz əlindədir, hər birinin də cavabı tez və ya gec qayıdır. Mənim etdiklərim mənə qalsın, sonda Cabir Novruzun misraları ilə bitirmək istərdim:

Tələsin yaxşılıq daşımağa siz,

Onun yollarını tutub kəsməyin

Tələsin ömür edib, yaşamağa siz

Ölməyə, ölməyə çox tələsməyin..."

Bəstəkar Elza Seyidcahan:

“Bu günə kimi hansı yaxşılıqları etməmişəm? Əslində, mən vasitəçiyəm. Bütün yaxşılıqları Allah edir. Nə xoş ki, məni vasitəçi seçib. Hərdən, anam deyir ki, hamının qayğısına qalan, işlərini görən “yazıq Elzadır”. Mənsə cavabımda: xoşbəxtəm ki, yaxşılıq edirəm. Yazıq o adamlardır ki, varlıdırlar, amma yaxşılıq etmirlər, edə bilmirlər”.

İlahiyyatçı Tural İrfan:

“Əslində insan etdiyi yaxşılığl reklam etməməlidir. Maddi imkanım normal olmasa da imkan olduğu qədər ehtiyacı olanlara dəstək oluruq. Əsasən çox adama mənəvi dəstək olmuşam. Dinimizə görə bəzən bir insana xoş söz demək də sədəqədir, yaxşılıqdır. Mənə pislik edənlər də çox olub. Ancaq mən o adamlara da yaxşılıq etmişəm. Yaxşılıq etmək qandan gəlməlidir. Kimin qanı, geni təmizdirsə o yaxşılıq edəcək.

Yaxşılığın günü, saatı olmaz. İstənilən zaman insan yaxşılıq etməlidir. Elə olub məndən yolpulu istəyən adama axırıncı manatımı verib özüm piyada gəlmişəm evə. İnsanlara doğru yol göstərməyin özü də yaxşılıqdır. Yaxşılıq ancaq pulla, maddiyyatla olmur. Bir adamın çətinliyini aradan qaldırmaq, ona istiqamət vermək, onu çıxılmaz vəziyyətdən xilas etmək də yaxşılıqdır. Yaxşılığı təmənnasız etmişəm hər zaman. Təmənnalı yaxşılıq yaxşılıq deyil, alverdir”.

Oğuz