Xəbər verdiyimiz kimi, özbəkistanlı yazıçı-publisist, araşıdırmaçı-jurnalist, Ednews.net-in Mərkəzi Asiyadakı müxbiri Şöhrət Barlas Azərbaycan Yazıçılar Birliyinin (AYB) fəxri üzvü seçilib.
Ednews xəbər verir ki, bu münasibətlə BAMF-ın baş ofisində Şöhrət Barlasla görüş keçirilib.
Beynəlxalq Avrasiya Mətbuat Fondunun prezidenti Umud Mirzəyev Şöhrət Barlası təbrik edib, ona ürək sözlərini çatdırıb:
“Bu gün toplanmağımızın özəl bir səbəbi var. Səbəb Şöhrət Barlasdır. Biz onunla 10 ildir ki, dostuq, qardaşıq. Onun BAMF-la uzun illəridi əməkdaşlığı var. Şöhrətin bu gün tərcümeyi-halında özəl bir hadisə baş verdi. AYB-nin fəxri üzvü seçildi. Şöhrət Eurasia Diary-nin Mərkəzi Asiya jurnalisti, nümayəndəsi, müxbiridir. Böyük bir bölgə demək olar ki, əhatə dairəsindədir. Son illər Azərbaycan əsgərlərinin sırasında imiş kimi, Şöhrət də öz qələmi ilə bir əsgər olaraq mücadilə apardı bizimlə. Şöhrət, Qarabağ savaşında ləyaqətlə, öz dirənişini göstərən, həbslərə, təhdidlərə boyun əymədən, qorxmadan, çəkinmədən bu yolda bizə böyük dəstək verdi. Bunların hamısı gözümüzün qarşısında olub. O, gecə-gündüz arxivlərdə çaba göstərdi, çalışdı. Onun AYB-yə fəxri üzv seçilməyi hadisədir. AYB sədri, hörmətli yazıçımız Anar da Şöhrəti hörmətlə qarşıladı, ona Azərbaycana tez-tez gəlməsini vurğuladı”.
Görüşdə Türkiyənin Strateji Araşdırmalar Diplomatik Mərkəzinin rəhbəri və Paris Universitetinin mədəni diplomatiya kafedrasının müdiri Naciye Selin Şenocak, qazi, jurnalist Rey Kərimoğlu, jurnalist Fuad Abbasov və BAMF əməkdaşları iştirak ediblər.
Görüş ərzində iştirakçılar Şöhrət Barlası təbrik ediblər. Sonda xatirə fotoları çəkdirilib.
Qeyd edək ki, Salamov Şuhrat Nəsir oğlu BARLAS yeganə Özbəkistanlı şəxsdir ki, illərlə “AzTV”, “İctimai TV”, “Lider TV”, “Xəzər TV”, “CBC TV” və digər informasiya-analitik resurslarda Qarabağ haqqında verilişlərin yaradılmasına birbaşa ekspert-məsləhətçi olaraq köməklik göstərmişdir. Eyni zamanda, yeganə Özbək müəllifdir ki, Qarabağ müharibəsinin mənşəyinin tarixi, etnik münaqişə və müharibənin nəticələri ilə bağlı dünyanın müxtəlif media resurslarından özbək, azərbaycan, türk, rus və ingilis dillərində 1000-dən çox məqalə dərc etdirmişdir. İkinci Qarabağ müharibəsi zamanı o, 44 gün ərzində sosial şəbəkələrdən və dünyanın müxtəlif media resurslarından çox sayda video kontentlər yaradaraq nümayiş etdirib.
Azərbaycanla bağlı jurnalist araşdırmaları üçün materiallar hazırlamaq məqsədilə Qarabağın bütün cəbhə bölgələrinə gedən Salamov Şuhrat Nəsir oğlu BARLAS hərbi jurnalistika bacarığını dünya ictimaiyyətinə təqdim etdiyi kitabları, məqalələri, sənədli filmləri və televiziya verilişləri ilə göstərmişdir. Qarabağ həqiqətlərini dünya mediasında işıqlandırdığı üçün, Azərbaycan Respublikası Milli Elmlər Akademiyası, A.A.Bakıxanov adına Tarix İnstitutunun Elmi Şurasının qərarı ilə "Fəxri doktor" ünvanına layiq görülmüşdür.
O, həmçinin 2015-ci ildən beynəlxalq informasiya agentliyi «EURASIA DIARY»-nin Mərkəzi Asiya üzrə xüsusi müxbiri kimi Özbəkistan və Azərbaycan arasında dostluq və qardaşlığın möhkəmləndirilməsi missiyasını yerinə yetirir.
Oğuz
