Aprelin 24-də Özbəkistanlı jurnalistlər Beynəlxalq Avrasiya Mətbuat Fondunun baş ofisində olublar.
Ednews xəbər verir ki, BAMF prezidenti Umud Mirzəyev qonaqları qarşılayıb, onlara təşkilatın yaranması tarixindən, fəaliyyətindən, fondun missiyasından ətraflı məlumat verib.
Baş tutan görüşdə Özbəkistan Jurnalistlər İttifaqının sədri Xolmurad Səlimov, Özbəkistan Həmkarlar İttifaqının “Trest” və “Doverie” qəzetlərinin baş redaktoru Husan Ermatov, Özbəkistan Jurnalistlər İttifaqı yanında Gənc Jurnalistlər Şurasının sədri Şöhrət Oripov, Özbəkistanın “Tonq yüztəri” qəzetinin baş redaktoru Feroza Odilova, Özbəkistan Dövlət İnformasiya Agentliyinin Beynəlxalq xəbərlər redaksiyasının redaktoru Əzizə Həlimova çıxışılarında Azərbaycanın və Özbəkistanın media sahəsindəki təmaslarının gücləndirilməsinin vacibliyindən, iki qardaş ölkənin uzun müddətli əməkdaşlıqlarından, tarixi bağlılıqlardan danışıblar.
Səmimi keçən görüşdə qonaqlar ənənəvi özbək plovu gətiriblər. Plovu dəmləyən Özbəkistan Həmkarlar İttifaqının “Trest” və “Doverie” qəzetlərinin baş redaktoru Husan Ermatov olub. Özbəkistanda demək olar ki, bütün kişilər və qadınlar plov bişirə bilirlər. Mərasim plovunu bişirmək isə bir qayda olaraq kişilərə həvalə edilir. Adətə uyğun olaraq H.Ermatov BAMF-ın həyətində özbək plovunu dəmləyib. Qonaqlar və fondun əməkdaşları özbək plovundan dadıblar.
U.Mirzəyev çıxışında rəhbəri olduğu Beynəlxalq Avrasiya Mətbuat Fondunun 90-cı illərdə keçdiyi yoldan, Qarabağda yaşanan erməni vandallığından danışıb. O, Özbəkistan və Azərbaycan arasında, o cümlədən media mənsublarının birgə fəaliyyətinin önəminə toxunub.
Özbəkistanlı jurnalistlərin Azərbaycana səfərlərində təşəbbüs göstərən Mətbuat Şurasının İdarə Heyətinin üzvü, “Azxeber.com” saytının baş redaktoru Hacıbəy Heydərli də görüşdə iştirak edib. O çıxışında Özbəkistan və Azərbaycan arasındakı media əlaqələrindəki intensivliyindən, iki ölkə arasındakı dostluqdan söz açıb.
Görüşdə ölkələrimizin ortaq tarixə, mədəni köklərə, oxşar adət-ənənələrə malik olduğu, mədəni münasibətlərin günü-gündən daha da dərinləşməsindən, bu istiqamətdə aparılan işlərdən də danışılıb.
Xatırladaq ki, aprelin 22-də Mətbuat Şurası ilə Özbəkistan Jurnalistlər İttifaqı arasında əməkdaşlıq memorandumu imzalanıb.