Bu gün banqladeşli sosial sahibkar, iqtisadçı, Nobel mükafatı laureatı Məhəmməd Yunusun anadan olduğu gündür.

Ednews xəbər verir ki, bu münasibətlə Beynəlxalq Avrasiya Mətbuat Fondunun (BAMF) prezidenti Umud Mirzəyev və Fondun əməkdaşları 84 yaşı tamam olan Məhəmməd Yunusu ad günü münasibətilə təbrik edir, ona ilhamının tükənməməsini, ruh yüksəkliyi və möhkəm can sağlığı arzulayır, bir daha iqtisadi və sosial sektorun inkişafına verdiyi dəyərli töhfələrə görə təşəkkür edir. 

Məhəmməd Yunis dünyada bank krediti barədə təsəvvürləri dəyişməklə sosial biznesin inkişafına böyük töhfələr verib. 1974-cü ildə  Banqladeşin bir kəndində aclığa şahid oluqdan sonra Yunis yoxsulluqla mübarizə sahəsində fəaliyyətə başlayıb və kənd təsərrüfatı iqtisadiyyatı üçün proqram hazırlayıb. O, kiçik sahibkarlığın, ailə biznesinin inkişafı üçün sahibkarlara aşağı faizlə və girov qoymadan kredit verilməsini nəzərdə tutan mikrokredit anlayışını işləyib hazırlayıb.
1983-cü ildə o Grameen (“Kənd bankı”) adlı özünün bankını açıb. Bank Banqladeşin az gəlirli sakinlərinə kredit verirdi. Bu şəkildə o yalnız inkişaf etməkdə olan ölkələrdə deyil həm də ABŞ da daxil olmaqla sənaye dövlətlərində insanlara yardıma əsaslanan sosial biznesin yaradılmasının mümkün olduğunu sübut etmiş oldu.

2006-cı ildə Banqladeşli Məhəmməd Yunis iqtisadi və sosial sektorun inkişafı sahəsindəki səylərinə görə Nobel Sülh mükafatına layiq görülüb.

Professor Məhəmməd Yunis dünyanın 20 dövlətinin 55 nüfuzlu universitetinin fəxri doktorudur. O, 26 ölkədən 112 mükafat, o cümlədən 10 ölkənin dövlət mükafatını alıb.

Məhəmməd Yunis eyni zamanda həm Nobel mükafatını, həm ABŞ- Prezidentinin Azadlıq medalını və ABŞ Konqresinin qızıl medalını almış az sayda adamlardan biridir.

İlk dəfə 2016-cı ildə Beynəlxalq Avrasiya Mətbuat Fondunun (BAMF) dəvəti ilə Məhəmməd Yunus Azərbaycana səfər gəlib. O, Azərbaycan Prezidenti İlham Əliyev və digər yüksək səviyyəli dövlət və hökumət rəsmiləri tərəfindən qəbul edilib. Məhəmməd Yunis Azərbaycandakı xarici səfirliklərin və diplomatik nümayəndəliklərin, eləcə də bir çox nazirliklərin, komitələrin və rəsmi şəxslərin təmsilçilərinin iştirak etdiyi “Sosial biznes” mövzusunda keçirilən tədbirdə mühazirə ilə çıxış edib. İyunun 20-də tanınmış iqtisadçı, “Qremin” bankının və 41 ölkədə fəaliyyət göstərən  və dünyanın bir çox yerlərində 5000-dən çox filialı olan iqtisadi təşkilatların qurucusu Məhəmməd Yunis “Kasıbların bankiri” kitabının azərbaycan dili versiyasının təqdimat mərasimində çıxış edib. Kitabın tərcüməsi Beynəlxalq Avrasiya Mətbuat Fondu tərəfindən həyata keçirilib. Kitabın öz sözü Umud Mirzəyevə məxsusdur. Mərasimdə professor Məhəmməd Yunis vətəndaş cəmiyyətinin inkişafına, sosial və iqtisadi inkişafına verdiyi töhvələrə, həmçinin dünya elminin inkişafındakı əvəzsiz roluna görə BAMF-ın ən yüksək mükafatına layiq görülüb.

Xatırladaq ki, M.Yunus sonuncu dəfə Bakıda bu ilin mart ayında səfərdə olub. O, Beynəlxalq Avrasiya Mətbuat Fondunun (BAMF) ofisində Himayəçilik şurasının üzvlərinin iştirakı ilə görüş keçirib.