Milli Məclisdə çıxışı zamanı gənclərin yay aylarında könüllülük prinsipi əsasında Qarabağda bərpa-quruculuq işlərinə cəlb olunmasını təklif edən millət vəkili Aqil Abbasın fikirləri sosial şəbəkələrdə geniş müzakirələrə səbəb olub.
Məsələ ilə bağlı EDnews-un suallarını cavablandıran deputat səsləndirdiyi fikirlərin yanlış təqdim edildiyini bildirib.
Aqil Abbas açıqlamasında bildirib ki, onun çıxışı bəzi şəxslər tərəfindən təhrif olunaraq sanki gənclərin heç bir ödəniş almadan Qarabağda işləməyə göndərilməsi kimi təqdim edilib.
Deputat qeyd edib ki, söhbət yalnız könüllülük əsasında həmin işlərdə iştirak etmək istəyən gənclərdən gedib və burada hər hansı məcburiyyətdən söhbət gedə bilməz:
“Kim istəyər gedər, kim istəyər getməz. Mən heç vaxt deməmişəm ki, gənclər pulsuz işləsinlər. Əksinə, hesab edirəm ki, Qarabağda çalışan gənclər əməkhaqqı almalı, onlar üçün müəyyən güzəştlər və imtiyazlar nəzərdə tutulmalıdır. Bu həm onların gələcək karyerasında, həm də işlə təmin olunmalarında üstünlük yarada bilər”.
Aqil Abbas bildirib ki, Qarabağın bərpasında iştirak edən gənclərin əməyinin qiymətləndirilməsi vacibdir və bu proses onların peşəkar təcrübə qazanmasına da töhfə verə bilər.
Deputat bununla bağlı şəxsi nümunə də çəkib. O qeyd edib ki, Xalq şairi Məmməd Arazın nəvəsi hazırda Qarabağda çalışır və bu fəaliyyətini könüllü deyil, məhz əmək müqaviləsi, əməkhaqqı və gələcək perspektivlər əsasında həyata keçirir:
“Məmməd Arazın nəvəsi hazırda Qarabağda işləyir. O, maaş alır, çalışır və öz peşə fəaliyyətini davam etdirir. Mənim də demək istədiyim məhz budur. İnsanlar işləməli, zəhmətlərinin qarşılığını almalı və gələcəkdə bu fəaliyyətləri nəzərə alınmalıdır”.
Millət vəkili sosial şəbəkələrdə yayılan müzakirələrə də münasibət bildirib. O vurğulayıb ki, son günlər yenidən gündəmə gətirilən video çıxışı əslində üç il əvvəl səsləndirilib:
“Bu çıxış üç il bundan əvvəl olub. İndi hansı səbəbdən yenidən dövriyyəyə buraxıldığını və niyə məhz bu vaxt qərəzli şəkildə gündəmə gətirildiyini bilmirəm. Təəssüf ki, bəzi şəxslər fikirləri tam dinləmədən və ya kontekstdən çıxararaq fərqli formada təqdim etməyə çalışırlar”.
Aqil Abbas əlavə edib ki, Qarabağın bərpası ümummilli məsələdir və bu prosesdə iştirak etmək istəyən hər bir gəncin əməyinə dəyər verilməli, onların sosial təminatı və gələcək imkanları nəzərə alınmalıdır.
