Braziliya Ali Məhkəməsi ölkənin keçmiş prezidenti Jair Bolsonaronun üçüncü oğlu Eduardo Bolsonaronu qiyabi olaraq 4 il 2 ay müddətinə azadlıqdan məhrum edib.
EDnews xəbər verir ki, bu barədə “Reuters” məlumat yayıb.
Qərar Eduardo Bolsonaronun atasının çevriliş cəhdi ilə bağlı məhkəmə prosesi fonunda ABŞ-nin Braziliyaya qarşı sanksiyalar tətbiq etməyə çağırmasından sonra qəbul olunub.
Məlumata görə, Eduardo Bolsonaro atasına siyasi və beynəlxalq dəstək toplamağa çalışıb. Keçmiş prezident Jair Bolsonaro 2022-ci ildə hakimiyyətdə qalmaq məqsədilə çevriliş planlaşdırmaqda təqsirli bilinərək 27 il müddətinə azadlıqdan məhrum edilib.
Braziliya Ali Məhkəməsində 4 hakim prokurorluğun mövqeyini dəstəkləyib. Eduardo Bolsonaro “məhkəmə orqanlarını və hökumətin digər qollarına aid rəsmiləri hədələməkdə” ittiham olunub.
İttihama əsasən, o, atasının işi üzrə proseslərin onun üçün “uyğun şəkildə” başa çatmayacağı təqdirdə ABŞ sanksiyalarının tətbiqi istiqamətində çalışacağını bildirib.
Məhkəmə hökmünə əsasən, 41 yaşlı Eduardo Bolsonaro 8 il müddətinə dövlət vəzifəsi tuta bilməyəcək.
Eduardo Bolsonaro isə ittihamları rədd edib. O, yaydığı bəyanatda məhkəmə prosesini “absurd” adlandırıb və bildirib ki, əsas məqsəd onun adını seçkilərdən kənarlaşdırmaqdır.
Qeyd olunur ki, Eduardo Bolsonaro 2025-ci ildən ABŞ-də yaşayır. Qərara əsasən, o, Braziliyaya qayıdacağı təqdirdə həbs oluna bilər.
Hadisə Braziliya ilə ABŞ arasında münasibətlərin gərgin olduğu dövrə təsadüf edir. Məlumata görə, ABŞ Prezidenti Donald Tramp Eduardo Bolsonaronun qardaşı, prezidentliyə namizəd Flavio Bolsonaro ilə görüşüb.
