.jpg)
Bu gün futbol üzrə 23-cü Dünya Çempionatına start verilir. Mundial tarixində ilk dəfə olaraq turnirdə 48 komanda iştirak edəcək.
Dünya çempionatı ilə bağlı EDNews-a danışan idman eksperti Kənan Məstəliyev qarşıdakı yarışın bir sıra yeniliklərlə yadda qalacağını bildirib.
.jpg)
Ekspertin sözlərinə görə, komanda sayının artırılması azarkeşlərə yeni iştirakçıları yaxından izləmək imkanı verəcək:
"Tarixdə ilk dəfədir ki, Dünya Çempionatında 48 komanda iştirak edəcək. Bu, bizə yeni və maraqlı komandaları görmək imkanı verəcək. Məsələn, Özbəkistan kimi komandanın orada çıxış etməsi maraqlıdır. Kurasao kimi ada ölkəsinin komandasını da mundial səhnəsində görmək imkanımız olacaq. Həm yeni, həm orta güclü, həm də favorit komandaları izləyə biləcəyik."
Kənan Məstəliyev qeyd edib ki, komanda sayının çoxluğu qrup mərhələsində bəzi oyunlara marağı azalda bilər:
"Komanda sayının çox olması ilkin mərhələlərdə çempionata marağı bir qədər azalda bilər. Çünki zəif komandaların oyunlarını izləmək hər zaman maraqlı olmur. Amma bu dünya çempionatıdır və burada hər matçda sürpriz gözləmək olar. Pley-off mərhələləri yaxınlaşdıqca daha ciddi və rəqabətli qarşılaşmalar izləyəcəyik."
Ekspert bildirib ki, turnirin ABŞ, Kanada və Meksikada keçirilməsi də dünya çempionatları tarixində ilk dəfə baş verəcək:
"Bu da bir ilkdir. Turnir üç ölkədə keçiriləcək və çox böyük coğrafiyanı əhatə edəcək. Bu maraqlı olsa da, logistika baxımından müəyyən problemlər yarada bilər. Komandalar uzun məsafələr qət etməli olacaqlar. Bu səbəbdən fiziki hazırlıq və dözümlülük mühüm rol oynayacaq."
Onun fikrincə, məhz bu amillər səbəbindən mundialda fərdi ustalıqdan çox komanda oyunu ön plana çıxacaq:
"Bu turnirdə ulduz futbolçulardan çox komanda oyunu ön plana çıxacaq. Çünki komandalar meydandakı rəqiblərlə yanaşı, isti hava, yol yorğunluğu və oyunların çoxluğu kimi amillərlə də mübarizə aparmalı olacaqlar."
Kənan Məstəliyev çempionatın favoritləri sırasında Fransa, İspaniya, Braziliya, Argentina, İngiltərə, Almaniya və Portuqaliya yığmalarının yer aldığını bildirib.
"Favoritlər Fransa, İspaniya, Braziliya, Argentina, İngiltərə və Almaniyadır. Ən böyük namizədlər isə Fransa, İspaniya və İngiltərədir. Son dünya çempionu Argentina da mübarizə aparacaq. Portuqaliya da iddialıdır. Kriştiano Ronaldonun son dünya çempionatı ola bilər və bu, komanda üçün əlavə motivasiya yaradır."
Ekspert Türkiyə millisinin də diqqət çəkə biləcəyini vurğulayıb:
"Türkiyə yığmasının çox yaxşı heyəti var. Xüsusilə Hakan Çalhanoğlu, Arda Gülər və Kənan Yıldızın performansı xüsusi əhəmiyyət daşıyacaq. Onlar bu çempionatın ulduzlarına çevrilə və böyük sensasiyaya imza ata bilərlər."
Sonda Kənan Məstəliyev bildirib ki, futbolsevərləri maraqlı və uzun bir futbol marafonu gözləyir:
"Ümumilikdə çox maraqlı futbol marafonu bizi gözləyir. Mən düşünürəm ki, bu çempionatı izləməyə dəyər."
Aysu Əsədova
