Eurasia Diary xəbər verir ki, bu gün ABŞ və Çin xarici işlər nazirləri arasında gərginliyi ilə seçilən görüş keçirilib.
Görüşdə Çin Xarici İşlər Naziri Vang Yi iki dövlət arasında yaşanan iqtisadi müharibə, Tayvan problemi və Çinin ABŞ-da keçiriləcək ara seçkilərinə müdaxilə etməsi iddiasının ABŞ-la Çin arasında münasibətləri kəskinləşdirdiyini bildirib. Vang Yi həmçinin, tərəflər arasındakı münasibətlərin gələcək gedişatı barədə fikirlərini bildirərək qeyd edib ki, "ABŞ Çinlə münaqişə yaratmağın yerinə "qazan-qazan" prinsipi əsasında əməkdaşlığı yenidən qurmalıdır". Vang Yi açıqlamalarının sonunda ABŞ-ı yanlış istiqamətdə yürütdüyü fəaliyyətləri durdurmağa çağırıb. ABŞ Xarici İşlər Naziri Mayk Pompeo isə Çinlə aralarında kifayət qədər anlaşmazlıqların olmasına rəğmən problemlərin həlli üçün danışıqların ciddi önəm kəsb etdiyini vurğulayıb. Həmçinin, Pompeo Çinin yürüdüyü siyasətdən rəsmi Vaşinqtonun narahat olduğunu bildirib.
