Koronavirusun yeni aşkarlanan Nu variantı ilə bağlı panika böyüyür. Bir neçə ölkə “qırmızı siyahıya” salınıb, sərhədlər yenidən bağlanılır. Koronavirus epidemiyasının bu günədək aşkarlanan variantları arasında “ən çox mutasiyaya uğramış variant” olaraq bilinən Nu variantı elm adamlarını da təşvişə salıb. Xüsusilə Afrika qitəsində narahatlıqlar davam edir.
EDNews.net Türkiyə mətbuatına istinadən xəbər verir ki, alimlər rəsmi olaraq B.1.1.529 kimi tanınan Nu variantı ilə bağlı açıqlama veriblər. Hələlik yoluxanların sayının az olmasına baxmayaraq bir çox ölkə Nu variantı ilə bağlı qabaqlayıcı tədbirlərə başlayıb.
Yeni dalğaya səbəb ola bilər
Birləşmiş Krallıq Nu variantının ölkəyə keçməsinin qarşısını almaq məqsədilə Cənubi Afrikadan uçuşları dayandırmaq üçün tədbirlərə başlayıb. Britaniyanın Sağlamlıq sahəsində Təhlükəsizlik Agentliyinin açıqlamasında bildirilir ki, Nu variantı indiyədək qeydə alınanların ən narahatedici variantıdır. Nu Delta variantından daha böyük təhlükələrə yol aça və dünyada yeni dalğaya səbəb ola bilər. Böyük Britaniyanın “The Times” qəzeti səhiyyə naziri Sajid Javidə istinadən Botsvana, Namibya, Zimbabve, Esvatini və Lesoto ölkələri də daxil olmaqla Cənubi Afrikanın “qırmızı siyahıya” salınması üçün hazırlıqlara başlandığını yazıb. Bu ölkələrə səyahət qadağasının gündəmə gətirildiyi bir vaxtda Böyük Britaniyaya hər gün Cənubi Afrikadan 500-700 arası turistin gəldiyi məlum olub.
Sürətlə yayılır, dözümlüdür
Nu variantı ilə bağlı araşdırma aparan elm adamları bildiriblər ki, bu variant digərlərindən daha sürətli yayıla bilir, üstəlik müalicəyə tez təslim olmur. İlk olaraq Botsvana ve Honkonqda meydana çıxan Nu variantı alimləri davamlı PCR testinin həyəcanverici nəticələrindən sonra təşvişə salıb. Alimlər Nu variantının digər ölkələrdə də sürətlə yayıldığını müəyyən ediblər.
Avropa İttifaqından təcili zəng
Avropa İttifaqından Nu variantı ilə bağlı yeni açıqlama gəlib. Aİ Komissiyasının sədri Ursula von Der Leyen təcili fövqəladə qərarların qəbulu məsələsini gündəmə gətirərək, Cənubi Afrika ölkələri ilə Avropa ölkələri arasında uçuşların dayandırılmasının vacibliyini bildirib.
İsraildən açıqlama
Təşviş yaradan məlumatlardan sonra İsrail Səhiyyə Nazirliyi də Nu variantı ilə bağlı açıqlama verib. Nazirlik ölkədə Nu variantına yoluxmanın qeydə alındığını rəsmən təsdiqləyib. İsrailin nüfuzlu Haaretz qəzeti də ölkədə Nu variantının aşkarlanması ilə bağlı məlumat yayıb.
Almaniya da uçuşlarla bağlı məsələyə baxır
Almaniyanın Səhiyyə Nazirliyindəki mənbələr Reuters xəbər agentliyinə bildiriblər ki, cümə axşamından etibarən Cənubi Afrika ölkələrindən gələn uçuşların dayandırılmasına qərar veriləcək. Qərar cümə günündən tətbiq ediləcək. Hava yolu şirkətləri yalnız Cənubi Afrikada qalmış alman vətəndaşlarını daşıyacaq. Koronavirusa qarşı vaksin etdirənlər də daxil olmaqla Cənubi Afrika ölkələrindən qayıdanlar 14 gün karantində qalacaqlar. Almanyanın səhiyyə naziri Jens Spahn deyib ki, Nu variantı hamını narahat edir: “Təcili tədbirlərə başlanılmalıdır. Bu variantın Almaniyaya keçməsinin qarşısı alınmalıdır”.
Cənubi Afrikadan sərt reaksiya
İngiltərənin Cənubi Afrikaya uçuş qadağası ilə bağlı qərarına qarşı tərəfdən sərt reaksiya verilib. Cənubi Afrika Respublikasının hökümət rəsmiləri İngiltərənin qərarını “tələsik verilmiş qərar” kimi qiymətləndiriblər. CAR-ın Xarici işlər naziri Naledi Pandor bildirib ki, qərarın turizmə və ölkələrarası ticarətə təsir edəcəyindən narahatdırlar. Nazir ingilis həmkarları ilə danışacağını, qərara yenidən baxılmasını istəyəcəklərini də qeyd edib.
Nu variantında bir çox mutasiyadan əlamətlər var
Alimlər Nu variantında Beta variantındakı K417N ve E484A mutasiyalarının aşkarlandığını, mutasiyaların vaksinlərə qarşı dözümlü olduğunu da qeyd ediblər. Eyni zamanda, Delta variantında olan N440K və Nyu-York variantında olan S477N mutasiyaları da müşahidə edilib. Bir yandan da mütəxəssislər Nu variantında P681H ve N679K mutasiyalarını aşkarlandıqlarını, bu mutasiyaların çox nadir halda bir yerdə müşahidə edildiyini açıqlayıblar. Bu mutasiyalar vaksinə qarşı dözümlülüyü artırır. Nu variantında müşahidə edilən N501Y mutasiyası isə yayılmanın sürətlənməsinə təsir edir. Nu variantında eləcə də G446S, T478K, Q493K, G496S, Q498R və Y505H mutasialarının aşkarlandığı da rəsmi təsdiqlənib. Amma hələlik bu mutasiyaların nələrə səbəb olduğu ilə bağlı araşdırmalar yekunlaşmayıb. Ümumilikdə, Nu variantında aşkarlanan mutasiyalar antikorlardan qaçmağa kömək edir, peyvəndə qaşı güclü müqavimət göstərir, infeksiya sürətini artırır. Ümumdünya Səhiyyə Təşkilatı yeni variantla bağlı xəbərdarlıq edib.
