Dünyanın ən varlı insanı olan sahibkar İlon Mask Twitter-ə nəzarəti ələ keçirdikdən sonra hər kəsi qıcıqlandıran hərəkətlər və açıqlamaları ilə diqqət mərkəzindədir.
Hətta şirkətində hələ də öz işinə davam edən bir çox əməkdaşlar onun bu davranışlarından qəzəblənməyə başlayıblar.
Xatırladaq ki, Mask, Twitter-ə nəzarəti ələ keçirdikdən dərhaı sonra minlərlə əməkdaşı işdən çıxarıb. Bununla da kifayətlənməyən milyarder hədə-qorxu gələrək iş saatlarını da artırıb. O, “ya daha sərt iş rejiminə alışın”, ya da “buranı tərk edin” deyərək işçilərə müraciət edib.
O, həmçinin Twitter-in gəlirlərinin azalmasında reklam şöbəsininin işini də tənqid edib.
Maraqlıdır ki, son vaxtlar milyarder Twitter-in öz işçilərinin və ümumilikdə “Qaradərililərin Həyatı Önəmli” hərəkatının irqçilik əleyhinə fəaliyyətlərini ələ salmağa başlayıb.
Mask Twitter-in daxili biznes qrupu tərəfindən qaradərili işçilər üçün hazırlanmış köynəklərə gülüb.
Daha sonra o, “Qaradərililərin Həyatı Önəmli” hərəkatının tərəfdarlarını sərt tənqid edib. O, bu köynəklərin Missuri ştatının Ferqyuson şəhərindəki etirazlardan qaynaqlandığını və bu nümayişlərin yanlış yönləndirildiyini bildirib.
Elnur Ənvəroğlu
.jpg)
