Londonda 17 il polis çalışan David Karik 49-dan çox zorakılıq və cinsi zorlama aktlarında iştirak etdiyini etiraf edib. Hadisə ölkədə böyük qalmaqala səbəb olub. Hazırda Britaniyanın dövlət rəhbərləri bu məsələnin araşdırılmasında ciddi tədbirlər görməyə başlayıb. 

Məsələ ilə bağlı Ednews-a danışan britaniyalı jurnalist Nil Uatson bildirib ki, bu, əslində Londonda xidmət edən polis əməkdaşları tərəfindən törədilmiş cinayətlər silsiləsinin bir neçəncisidir. 

“Bu, həm də Britaniya polisinin bir növ qadına və irqçiliyə olan münasibətinə aydınlıq gətirmiş oldu. Qeyd edim ki, digər cinayət hadisəsi ilə bağlı ötən il  Veyn Kuzens adlı polis də adam oğurluğu, zorlama və qətlə görə ömürlük həbs cəzasına məhkum edilib. Hətta yüksək rütbəli polis komissarı Kressida Dik bu məsələyə görə istefa verməli olub. Hazırda 1000-ə yaxın iş araşdırılma prosesindədir və rəsmi qurumlar buna çox ciddi yanaşır”. 

Jurnalist hadisə ilə bağlı London merinin xeyli sarsıldığını da bildirib. O, qeyd edib ki, London polisləri ilə bağlı intizam tədbirinin artırılması məqsədilə ciddi islahatlara start verilib. 

“London meri Sadiq Xan tərəfindən polis siyasəti xüsusi olaraq pislənib və o, polis komissarı Mark Roulinin təşəbbüsü ilə polis fəaliyyətini tam nəzərdən keçirilməsini tələb edib. Bu işlə bağlı xüsusi fəaliyyətə hətta anonim şikayətlər üzrə qaynar xətt və korrupsiyaya qarşı mübarizə qrupu da daxil edilib”,- deyə Uatson bildirib. 

Hadisənin sonrakı nəticələri ilə bağlı danışan ekspert hətta bunun son dərəcə təsirli və riskli olacağını da qeyd edib.  

“Ən pisi budur ki, qurunun oduna yaş da yanacaq - biz çoxlu təcrübəli polis əməkdaşımızı itirəcəyik. Bununla belə, cinayət törədən polis məmuru ictimaiyyət üçün təhlükəli obyektə çevrilib. Bu da ictimaiyyətin öz polis məmurlarından gözləntilərinin tam əksidir”.

Jurnalist sonda bildirib ki, həbs olunan polisi uzun araşdırmaların ardınca ömürlük həbs gözləyə bilər. 

Elnur Ənvəroğlu