Təbriz Universitetinin Türk dili və ədəbiyyatı fakültəsinin tələbələri dərslərdə iştirak etməməklə rəhbərliyə etiraz ediblər. Türk dili və ədəbiyyatı fakültəsinin tələbələri fars ədəbiyyatı bölməsinin professor-müəllim heyətini işə götürülməyə müdaxilə etmələrinə görə etiraz əlaməti olaraq sosial şəbəkələrdə bəyanat yayıb.

Məsələ ilə bağlı güneyli politoloq  Əli Zəmani Ednews-a açıqlamasında bildirib ki, Təbriz Universitetində çox ciddi müəllim çatışmazlığı var.

“Bu müəllim çatışmazlığının həlli üçün tələbələr təlkif edib ki, Azərbaycandan ora müəllimlər getsin. Amma universitetinin rəhbərliyi buna mane olub. Azərbaycan dili üzrə müəllim və mütəxəssis az olduğundan Fars fakültəsinin müəllimləri təklif edirlər ki, bizim fakültənin müəllimləri tələbələrə dərs desin. Tələbələr isə buna qarşıdırlar. Həmçinin, Azərbaycan dilində təhsil dayandırıblar. İranda daim Azərbaycan dilinə ögey münasibət var. Bu Pəhləvillər dövründən gəlir, hələ də davam edir”.

Poltitoloq İranın Azərbaycan dilinin müxtəlif yollarla məhv olunmasına görə çalışdığını da vurğulayıb:

“Təbriz Radio və Televiziyasında  Azərbaycan dilində proqramlar var. Lakin bu verlişlər dilimizi məhv edir. Orada olan danışıq, dil nə qrammatika baxımından, nə də leksik baxımdan bizim dilimizə uyğun deyil. Fars və Azərbaycan sözlərini qatıb özlərindən bir dil çıxarıblar, həmin dildə də proqram aparırlar. Məqsəd isə Azərbaycan dilini xalqa unutdurmaqdır. Hazırda televiziyaya baxsaq görəririk ki, danışığın 90 faizi Fars sözlərindən  yalnız feillər isə  Azərbaycan dilindədir. Kanalın adı isə Azərbaycan dilli yayım kimi qeyd edilir. İranda Azərbaycan dilini  alçaltmaq və gözdən salmaq üçün bir çox yollara əl atırlar”. 

Qeyd edək ki, İran İslam Respublikasının siyasəti nəticəsində bir neçə ildir ki, akademik kadrların işə götürülməsi məsələsində müxtəlif bəhanələrlə türk dili və ədəbiyyatı fakültəsi üçün maneələr yaradıb.

Aysel Şahmar