Bir müddət öncə yayılan bombalanmış doğum evindən qaçan hamilə qadının fotosu Ukraynadakı müharibənin ən simvolik görüntülərindən birinə çevrilib. Fotodaki qadın Rusiyanın dezinformasiya kampaniyasının da hədəfinə çevrilib.
Ednews xəbər verir ki, Rusiyanın Mariupoldakı hava hücumundan sonra çəkilən həmin foto internetdə, qəzetlərin birinci səhifələrində yayılıb və BMT Təhlükəsizlik Şurasında müzakirə edilib. Beləki, Rusiya qadının bu görüntüləri və hücumla bağlı yalanlar yayaraq, 29 yaşlı Marianna Vışemirskini yalandan "aktyorluqda" ittiham ediblər. Rus diplomatlar hətta onun bir yox, iki fərqli qadını “oynadığını” iddia ediblər.
Marianna çəkilən görüntüləri və haqqında səsləndirilən ittihamlarla bağlı "BBC”yə müsahibə verib:
“Mənə hədə-qorxu gəlirdilər ki, gəlib məni tapacaqlar, məni öldürəcəklər, uşağımı tikə-tikə edəcəklər”,- deyə, o, qeyd edib.
O, birdən-birə informasiya müharibəsinin mərkəzinə çevrilməkdən və müharibə zonasında qızı Veronikanı dünyaya gətirməkdən də danışıb:
"O, çətin bir zamanda dünyaya gəlməyi seçdi, ancaq heç gəlməməkdənsə, bu şəraitdə gəlməsi daha yaxşı idi".
Marianna bildirib ki, onun fotoşəkilləri xəstəxananın kənarında dayanıb əşyalarını dağıntılar altından çıxarılmasını gözləyərkən “Associated Press”in jurnalistləri tərəfindən çəkilib.
Daha sonra görüntülərin Kreml yönümlü “Telegram” kanalı tərəfindən “saxta” olduğu ilə bağlı yalan iddialar yayılıb. Yalanlar Rusiyanın yüksək vəzifəli məmurları və dövlət mediası tərəfindən də təkrarlanıb.
Marianna yalanlarla bağlı Rusiya rəsmilərini birbaşa tənqid etməkdən çəkinsə də, “Associated Press”i tənqid edib:
“Mənim fotolarımı sosial şəbəkələrdə yerləşdirən jurnalistlərin bu hücumun həqiqətən baş verdiyini təsdiq edə biləcək digər hamilə qadınlardan müsahibə almamaları məni incitdi”.
Marianna hücumdan sonra Donbas regionuna qaçıb və Rusiyanın dəstəklədiyi separatçıların tərəfdarı olan bloqqer Denis Seleznevə müsahibə verib. Onun bu müsahibədə istədiyini söyləməkdə nə qədər sərbəst olduğuna dair fərziyyələr yaranır:
“Mən bütün vəziyyəti öz gözlərimlə gördüyüm kimi təsvir etməli oldum”.
Qeyd edək ki, “BBC”nin müsahibəsi də Denis vasitəsilə təşkil olunub. Marianna müsahibəyə onun evindən qouşulub. Denis söhbət boyu iştirak edib, lakin müdaxilə etməyib. Mariannanın qohumları və dostları onun hazırda təhlükədə olmadığını bildiriblər.
Mirvari Əzizova
