“Şübhəsiz ki, Azərbaycan tərəfinin gərəkli sərt addımlar atması qaçınılmazdır və düşünürəm ki, tez bir zamanda irimiqyaslı anti-terror əməliyyatı keçiriləcək”.
Bu sözləri hərbi analitik Alp Arslan İmamqulu Ednews-a Laçında separatçı qüvvələrin son vaxtlar yenidən aktivləşməsi ilə bağlı açıqlamasında deyib. Ekspert əlavə edib ki, bununla bağlı ölkə rəhbərliyi beynəlxalq tədbirlərdə dəfələrlə xəbərdarlığını bildirib: “Təbii ki, bu barədə ölkə rəhbərliyi və siyasi dairələrimiz tərəfindən beynəlxalq arenada dəfələrlə məsələ qaldırılıb. O ki, qaldı buna qarşı cavab tədbirinə, şübhəsiz ki, Azərbaycan tərəfi gərəkli sərt addımları atmalıdır və düşünürəm ki, tez bir zamanda irimiqyaslı anti-terror əməliyyatı keçiriləcək. Bu da təbii ki, Laçın yolunun bağlanması və tez bir vaxtda Rusiya Sülhməramlılarının cavabdehliyində olan ərazilərimiz də daxil olmaqla geniş miqyaslı əməliyyatların keçirilməsi ilə mümkündür.”
Alp Arslan İmamqulu separatçı dəstələrin aktivləşməsində həm də bilavasitə rus sülhməramlılarının rolunun olduğunu deyib.
“Bölgədə sülhün təmin olunması və orta dəhlizdə əsas iştirakçı olmağımız Rusiyanın maraqlarına uyğun gəlmir. Bu səbəblə Rusiya bölgədə hərbi qarşı durmanın olmasında daha çox maraqlıdır. Çünki Rusiya yalnız bu formada Güney Qafqazda öz varlığını sürdürə bilər.
Dolayısı ilə Azəzbaycanın sərhədlərində və xüsusilə də Laçında atəşkəsin pozulması da bir növü Rusiya Federasiyasının icraatı kimi qiymətləndirilə bilər. Hətta bölgədə bir sıra terror aktlarının törədilməsinə sülhməramlılar birbaşa dəstək verirlər.”
Hərbi analitik həmçinin, buna cavab olaraq Azərbaycan tərəfinin sülhməramlıların fəaliyyəti ilə bağlı adekvat addımlar haqda düşündüyünü vurğulayıb.
Əgər sülhməramlı qüvvələr 10 noyabr bəyanatının tələblərini kobud şəkildə pozurlarsa onların fəaliyyətinə xitam verilməsini tələb etmək Azərbaycanın suveren hüququdur.
Ümumiyyətlə iki il ərzində baş verənləri nəzərə alaraq demək olar ki, tez bir zamanda irimiqyaslı anti-terror əməliyyatlarının başladılması qaçınılmazdır.
Elnur Ənvəroğlu
.jpeg)