"Azərbaycan torpaqlarında Rusiya Sülhməramlılarının gözü önündə son 15 gündə terrorçu fəaliyyətlərinin artması, həmçinin Rusiya Müdafiə Nazirliyi tərəfindən Azərbaycan torpaqlarının adlarının dəyişdirilməsi və tərəflər arasında razılaşmaya əks gedərək, Azərbaycanı günahkar çıxartmaq böyük bir təxribatçı planın bir hissəsidir”.
Bu sözləri türkiyəli sabiq general, hərbi analitik Yücəl Karaüz Ednews-a açıqlaması zamanı deyib. Onun sözlərinə görə erməni separatçılarının Rusiya Sülhməramlı dəstələrinin arasında gizlənməsi əməliyyatlara heç bir maneyə törədə bilməz:
“O ki, qaldı separatçı dəstələrin sülhməramlılar arasına sızması və onların bayrağı altında təxribatlara əl atması, biz bu cür hadisələrə İraq və Suriyada tez-tez rast gəldik. Hansı ki, oradakı terrorçu qruplaşmalar hər zaman Rus və ya Amerika bayrağı altında çıxış edərək prosesləri daha ciddi və həssas duruma gətirməyə çalışırlar.
“Azərbaycan hazırda baş verənlərə qarşı adekvat addımlar atarkən məsələdən kənara çıxmamağa və ən incə məqamnlara diqqət verməyə çalışır. Qeyd edim hazırki durum bir terror hadisəsidir və BMT-nin beynəlxalq hüquq üzrə 51-ci maddəsinə uyğun olaraq Azərbaycanın öz torpaqları və ərazisindən kənarda belə terrora qarşı mübarizə aparmaq və ölkəsini müdafiə etmək haqqı vardır.
Təbii ki, əgər burada bir Azərbaycan əsgərinin burnu belə qanayarsa bunun qarşılıqlı cavabı artıqlaması ilə verilməlidir. Yəni bir güllə atılan yerə cavab olaraq 500 güllə atılacağı heç də istisna edilmir”.
Sabiq general Rusiya tərəfinin hər hansı müdaxiləsi ilə bağlı belə deyib:
“Rusiyanın burada Azərbaycana qarşı hansısa hərbi müdaxilə etməsini gözləmirəm. Çünki Rusiya hazırda Ukrayna ilə mücadilədədir, həm də Rusiya Azərbaycan məsələsində Türkiyəni qarşısında görmək istəmir”.
Erməni separatçılarının sülhməramlı dəstələr arasında Azərbaycan əsgərinə qarşı silahlı təzyiq göstərməsi ilə bağlı hərbi ekspert Ədalət Verdiyev belə deyib: “Sülhməramlı kontingentin Azərbycana və Azərbaycan əsgərinə qarşı atəş açmasını mən birmənalı olaraq istisna edirəm”.
Ekspert vurğulayıb ki, Rusiya Sülhməramlı kontingentinin erməni separatçı və terrorçularına aktiv dəstəyi əvvəl də vizual olaraq müşahidə olunub. Onun sözlərinə görə, Rusiyanın Azərbaycana qarşı addım atması Rusiya tərəfinin Qarabağda Azərbaycanın anti-terror əməliyyatlarına hər hansı bir müdaxiləsi Şuşa bəyənnaməsinin işə düşməsinə və proseslərə hətta Türkiyənin də qatılmaını reallaşdıra bilər.
“Bu isə indiki vəziyyətdə Rusiya üçün heç də arzu olunan deyil. Onsuz da Rusiya Ermənistanı müharibədən əvvəl və müharibə zamanı kifayət qədər silah və sursatla dəstəkləyib. Lakin bu dəstəyin göründüyü kimi heç bir praktiki nəticəsi olmayıb”.
Ekspert əlavə edib ki, Azərbaycan lazım gəldikdə Fərrux, Quzdux, Sarıbaba, Laçın, Sus və Zabuxun azad edilməsində tətbiq etdiyi hərbi metodlardan bir daha istifadə edə bilər.
“Qarabağda Sülhməramlıların nəzarətində olan ərazilərdə separatçılara qarşı həyata keçirilən bu metodlar artıq sınaqdan çıxmış metodlardır və kifayıt qədər ciddi nəticə verir”.
Elnur Ənvəroğlu