Xəbər verdiyimiz kimi, Azərbaycan Respublikası Prezidentinin Administrasiyasının dəvəti əsasında sentyabrın 21-də Yevlax şəhərində Qarabağın erməni sakinləri ilə təmaslar üzrə müəyyən edilmiş məsul şəxs Ramin Məmmədov Qarabağın erməni sakinlərinin təmsilçiləri qismində Sergey Martirosyan və David Melkumyan ilə görüşüb. Rusiya-Türkiyə Birgə Monitorinq Mərkəzinin Rusiya tərəfinin rəhbəri kontr-admiral Oleq Semyonov iştirakçı qismində görüşə qatılıb. Konstruktiv və müsbət mühitdə keçən görüşdə hansı məsələlərin müzakirə edilməsi və nəticələrin necə olması ictimaiyyət tərəfindən böyük maraq doğurur.
Mövzunu Ednews-a şərh edən politoloq İlyas Hüseynov bildirib ki, Yevlax şəhərində erməni nümayəndələri ilə görüşün keçirilməsi mühüm bir hadisədir:
“Bu hadisə Azərbaycanın uğurlu antiterror tədbirlərinin siyasi və diplomatik nəticəsidir. Düşünürəm ki, bu danışıqlarda təhlükəsizlik arxitekturasının qurulması, regionun hərbisizləşdirilməsi və silahlı birləşmələrin qalıqlarının bölgəni tərk etməsi məsələsi müzakirə olunacaq. Digər mühüm məsələ isə reinteqrasiya prosesi çərçivəsində Azərbaycan vətəndaşlığını qəbul etməli olan etnik ermənilərin fəaliyyətinin ölkə vətəndaşı kimi tənzimlənməsidir. Hər iki aspekt çox mühüm əhəmiyyət daşıyır və prioritet təşkil edir. Bu barədə Azərbaycan dövləti uzun müddətdir ki, çağırışlar edir. Yevlax görüşündə də bu məsələlər müzakirə olundu”.
Politoloqun sözlərinə görə, görüşdən ilkin təəssüratlar normaldır və Azərbaycanın haqlı tələbləri yerinə yetirilməlidir:
“Azərbaycanın mövqeyi ədalətlidir və beynəlxalq hüququn norma və prinsiplərinə söykənir. Ərazi bütövlüyümüz, suverenliyimiz və sərhədlərimizin toxunulmazlığı konteksində bütün proseslər nəzərdən keçirilir. Azərbaycan öz gücünü, qüdrətini və peşəkarlığını nümayiş etdirdi. Hansısa razılıqdan boyun qaçırma və öhdəlikləri yerinə yetirməmək rəsmi Bakını adekvat addımlar atmağa sövq edə bilər. Düşünürəm ki, ermənilər Azərbaycanı buna vadar etməməlidirlər”.
Oğuz