“Uşaqlarla görüşüb evə gələndən 2 gün sonra atamın ürəyi partladı, demişdi ki, mənə baş daşı qoymayın”

 

“Mən atamı çox istəyirdim, çünki o insan adam idi. Baxmayaraq ki, bütün günü işdə olurdu, teatrda tamaşa oynayıb, filmlərə çəkilirdi, amma mənə də lazımı qədər vaxt ayırırdı. Heç vaxt qayğısını məndən əsirgəmirdi. Tez-tez məni kinoteatra aparırdı. Atamla kinoya getdiyim gün mənim üçün bayram idi. Çünki çox məşğul insan idi. “Ələddinin sehrli çırağı” filminə Yaltada çəkilirdi, anamla məni də özü ilə aparmışdı. Rejissor gəlib bir çox şeyləri atamla məsləhətləşirdi. Bu mənim çox xoşuma gəlirdi ki, gəlib atamla məsləhətləşirlər. Piyada gəzməyi çox xoşlayırdı, çünki taksi sürücüləri atamdan pul götürmürdü. Atam da buna görə taksiyə minmirdi. Mən də piyada gəzməyi ondan öyrənmişəm. Hər zaman gələcəyimi düşünürdü. Yadımdadır, bir dəfə 1-ci sinfə gedəndə gəlib ona dedim ki, ata, mən 5 almışam. Mənə dedi ki, gəlib mənə demə neçə almısan. Bu mənə yox, sənə lazımdır. Onun bu sözlərindən sonra hər gün oturub kitab oxuyurdum”.

 

 

Bunu xalq artisti, sevilən aktyor Hüseynağa Sadıqovun qızı Tamilla Sadıqova Moderator.az-a bildirib.

 

O daha sonra atasının uşaqlara olan sevgisindən danışıb.

 

 

“Atam televiziyada “Piri babanın nağılları”, “Xoruz baba” kimi səhnəciklərlə, verilişlərlə məşhurlaşmışdı. Hamı ona Xoruz baba deyə müraciət edirdi. Hətta indi də məni görəndə deyirlər ki, Xoruz babanın qızı gəlir. Atam uşaqlara hər zaman deyirdi ki, nağılları sona qədər oxuyun, çünki nağıllarda sonda xeyir qüvvə şər qüvvəyə qalib gəlir. O vaxt evimizə uşaqların meşoklarla məktublarını gətirirdilər. Atam vaxt edib, hamısını oxuyurdu və efir vasitəsilə səsləndirirdi. Uşaqlara onu çox qısqanırdım. Bir dəfə atamla şəhərdə gəzəndə 5-6 uşaq atamın üstünə qaçdı. Atam da mənim əlimi buraxıb, onlarla söhbət etməyə getdi. Mən də başladım ağlamağa. Atam dedi ki, sən mənim qızımsan, amma mən o biri uşaqlara da diqqət yetirməliyəm. Atam uşaqlarla çox rahat dil tapırdı, onları hər zaman sevindirirdi” deyə aktyorun qızı bildirib.

 

Tamilla Sadıqova atasının onun incəsənətə gəlməsinə razılıq vermədiyini də bildirib.

 

 

“İstəyirdim ki, onun sənətini davam etdirim, amma atam razı olmadı. Deyirdi ki, bu sənət çox ağırdır. Mən də filoloq oldum. Vaqif Səmədoğlu kinostudiyada işləyirdi, mən də universiteti qurtarmışdım. Moskva Kinematoqrafiya İnstituna sənəd vermək istədim. Sənədlərimi Vaqif Səmədoğluna təqdim etdim. Səhər apardım, axşam gördüm ki, sənədlər evdədir. Atam alıb evə gətirmişdi” deyə Tamilla Sadıqova bildirib.

 

Tamilla Sadıqova atasının son günlərini də xatırlayıb.

 

 

“Atam ağır xəstə idi, xəstəxanadan çıxarıb, evə gətirmişdik. Televiziyadan bizə xəbər verdilər ki, uşaqlar gəlib, sizlə görüşmək istəyirlər. Anam da dedi ki, o xəstəxanadan yeni çıxıb, necə gələ bilər axı?! Atam anamın sözlərinə məhəl qoymadı, xəstə olsa da gedib uşaqlarla görüşdü. Bu onun uşaqlarla son görüşü oldu, o görüşdən 2 gün sonra atam dünyasını dəyişdi. Ürəyi partlamışdı (kövrəlir). Demişdi ki, mənə baş daşı qoymayın, bircə üstünə yazın ki, burada kim dəfn olunub. Başqa heç nə yox! Çünki o bir sənət yoldaşının məzarını ziyarət edəndə görmüşdük ki, sadə qəbri var. Biz də atamın son vəsiyyətini yerinə yetirdik” deyə aktyorun qızı bildirib.

EurasiaDiary © Xəbərlərdən istifadə zamanı hiperlinklə istinad olunmalıdır.

Bizi izləyin:
Twitter: @EurasiaAz
Facebook: EurasiaDiaryAzerbaycan
Telegram: @eurasia_diary