Publisist Asif Bəkirlinin yeni “KAMİLLİYƏ DOĞRU” adlı kitabı nəşr olunub.

Ednews xəbər verir ki, kitab ümumilikdə iki əsas hissədən ibarət olmaqla, birinci hissə həyatla, vətənpərvərliklə, dəyərlərlə, gəncliklə, idarəetmə, liderlik, səriştə, dövlət və dövlətçilik, insan və insanlığa bağlı baxış və düşüncələri olan aforizmlər, ikincisi isə daha əvvələr çap edilmiş bəzi şeirlərdən ibarətdir. Həmçinin də kitabda müəlliflə bağlı tanınmış ziyalı dostlarının fikirləri yer almışdır. 

Asif Bəkirli 1964-cü ildə Göyçay rayonunda neftçi ailəsində anadan olmuşdur. 1981-ci ildən əmək fəaliyyətinə çilingər kimi başlamış, həqiqi hərbi xidmətdən və Ali təhsilini bitirdikdən sonra 1989-cu ildən etibarən ölkənin ictimai-siyasi proseslərində fəal iştirak etməklə yanaşı, gənc mütəxəssis kimi neft sənayesində layihəçi-mühəndisdən başlayaraq ardıcıl olaraq çalışmış, 2011-ci ildən etibarən çalışdığı SOCAR-ın Baş ofisinin İnsan Resursları Departamentinin rəisi kimi işə qəbulun müsabiqə yolu ilə tam şəffaf və dürüst  həyata keçirilməsinin təmin edilməsində xüsusi rolu olmuşdur. Bunlarla yanaşı Azərbaycan KİVİHİ RH-nin qərarı ilə "Qızıl Qələm" media mükafatı laureatı,  Azərbaycan Mətbuat Şurasının "Demokratik dövlət quruculuğundakı xidmətlərinə və kütləvi informasiya vasitələri ilə fəal əməkdaşlığına görə" diplomu ilə eləcə də "XXI əsrin tanınmış ziyalısı" beynəlxalq diplomu ilə və Neft və qaz sənayesinin inkişafındakı xüsusi xidmətlərinə görə "Fəxri Fərman" ilə təltif edilmişdir. 29 sentyabr 2017-ci ildə Türk Dünyası Araşdırmaları Beynəlxalq Elmlər Akademiyasının Fəxri Professoru seçilmişdir. 30 may 2018-ci ildə Rusiya Federasiyası Yazıçılar İttifaqının Moskva şəhər təşkilatının A.S.Puşkin adına "Sözə və əmələ sədaqət" medalı ilə təltif olunub. Fəxri Professoru olduğu Türk Dünyası Araşdırmaları Beynəlxalq Elmlər Akademiyasının təqdimatı ilə Birləşmiş Millətlər Təşkilatının UNCOPA (UN Council for Public Awards) Şurasının "Mədəniyyət və Sülh Səfiri" fəxri adı verilməklə "Leybnis medalı" ilə təltif edilmişdir. 18 noyabr 2021-ci il tarixində "Erickson İnternational" şirkətinin Beynəlxalq "Professional Kouçinq Sertifikatına" layiq görülmüşdür.
Bir sıra bədii və elmi kitabların məsləhətçisi, həmmüəllifi və müəllifidir. "Beynəlxalq İdarəetmə Standartları", "Əməyin Mühafizəsi və Təhlükəsizliyi İdarəetmə Sistemi", "Beynəlxalq idarəetmə sistemlərinin inteqrasiyası və auditi (sənədləşdirmə nümunələri)", "İnsan resurslarının idarə edilməsi: nəzəriyyədən praktikaya", "Düşündüklərim… Qənaətlərim… Praktikadan nəzəriyyəyə”,"Haqq səsiyəm" (şerlər),  "Vicdan" müəllifi olduğu  kitablardır. 15 fevral 2023-cü il tarixli qərara əsasən "Türk Dünyasının Fahri Aydını Uluslararası Ödülü" ilə təltif edilmişdir.

Azərbaycan Respublikası Prezidenti cənab İlham Əliyevin "Azərbaycan Respublikasının neft sənayesi işçilərinin təltif edilməsi haqqında" 2014-cü il 19 sentyabr tarixli 734 nömrəli Sərəncamı ilə Azərbaycan neftçilərinin peşə bayramı və "Əsrin müqaviləsi"nin 20 illiyi münasibətilə ölkənin neft sənayesinin inkişafında xidmətlərinə görə "Tərəqqi" medalı, 19 sentyabr 2016-cı il tarixli Sərəncamına əsasən Azərbaycan neft sənayesinin inkişafında xidmətlərinə görə "Əməkdar mühəndis" fəxri adı verilmişdir.

Oğuz