“Həm oxucu, həm müəllif kimi iştirak etməkdən zövq aldım. Oxucular artıb. Həm də xeyli artıb. Ancaq fikir verirdim ki, gələnlərin böyük əksəriyyəti az kitab alırdı. Yarmarka nədir? Fürsət deməkdir, çoxlu alış-veriş etmək deməkdir. Ancaq insanlar ürəkləri istəyən qədər kitab ala bilmirdilər. Bahalıq var idi”.

Bu sözləri Bakı Beynəlxalq Kitab Sərgisində Ednews-a açıqlamasında yazıçı Sevinc Elsevər deyib.

Onun sözlərinə görə, yerli müəlliflərin də, xarici kitabların da qiymətlərində artım müşahidə edilir:

“İki-üç kitabdan ötrü adamların o boyda yolu durub gəlməklərinə hayfım  gəlirdi. Qınamaq olmur insanları. Mən özüm də bir kitab aldım, cəmi-cümlətanı bir kitab. Ancaq uşaqlarıma 5-6 kitab ala bildim. "Qızın oldu, qırmızı donunu çıxart" və ya "balalı qarğaya yem yoxdur" misalı. Çox adam da şəkil çəkdirməyə gəlirdi tanınmış imzalarla, bir-birləriylə. İnstagram, vatsap üçün. Müəllimələr gördüm, şagirdləriylə gəliblər, ancaq şəkil çəkdirirlər. Gah bu stendin önündə, gah o biri. Təbii ki, vatsap, instaqram üçün. Kitabla az maraqlanırdılar. Gülməyim tuturdu onlara baxanda. Ancaq eybi yoxdur, bu da inkişaf əlamətidir. Təki belə işlərlə də yarışsın insanlarımız. Eybi yoxdur, qoy şəkil də çəkdirməyə gəlsinlər. Bir kitab alsınlar. Hətta yanlış kitabı seçsinlər, zövqsüz oxucu olsunlar. Ancaq gəlsinlər, kitab üçün gəlsinlər. Sonrası Allah Kərimdir. Belə yarmarkalar, festivallar tez-tez keçirilməlidir. Təqdirəlayiqdir. İnsanlar kitab bayramını hiss elədilər, məncə. Xüsusən uşaqlarının əlindən tutub gətirməkləri adama ləzzət edirdi. Sevindiricidir. Lap xırda-xırda uşaqlarla gəlirdi analar, atalar.  Təşkilatçılar da, əməyi keçənlər də sağ olsun. İldən-ilə daha yaxşı olacağını ümid edirəm”.

Oğuz