“Məsələ ilə bağlı qanuna zidd hansı addımların atılması barədə məlumatım yoxdur. Təbii ki, yazıçılara evin verilməsi yaxşı təşəbbüsdür. Amma indi bunun növbədə olan, haqqı çatan və çatmayan məsələlərin araşıdırılması ictimaiyyətin də müəyyən dərəcədə haqqıdır”. 

Bu sözləri Ednews-a millət vəkili Fazil Mustafa mətbuatda yayılan və tənqidlərə məruz qalan Azərbaycan Yazıçılar Birliyinin ev siyahısına fikir bildirərkən deyib. Onun sözlərinə görə, əgər burada qanun pozuntusu varsa hüquq mühafizə orqanlarına müraciət oluna bilər:
“Güman etmirəm ki, burda xüsusi bir tərəfkeşlik və ya başqa məsələlər olsun. Çünki olduqca həssas təbəqədir. Təbii ki, bu təbəqədə də narazılıqların baş verməsi gözləniləndir. Yəni hər kəs özünün haqqı olduğunu düşünür, kiminsə ondan qabağa düşməsinə də münasibəti bir az aqressiv olur. Hər halda bunu hüquqi zəmində araşdırması daha doğru olar. Əgər qanun pozuntusu varsa düzəldilməlidir”. 

Qeyd edək ki, yayılan məlumatlara görə AYB-nın 21 üzvünə verilən mənzillərin əksəriyyəti 1-2 otaqlıdır. Lakin 3-4 otaqlı mənzillər də var. 21 mənzil əsasən, AYB-nın idarə aparatında çalışanlara, oradan dəfələrlə ev və avtomobil alanlara verilib. İddialara görə onların arasında elələri var ki, bu, AYB-dən aldığı üçüncü mənzildir.

Oğuz