Xəbər verdiyimiz kimi, mətbuat və sosial şəbəkələrdə Azərbaycan Yazıçılar Birliyinin bir qrup yazıçıya ev verdiyi, lakin siyahını açıqlamadığı bildirilir. Sonradan mediada ev alanların siyahısı yayımlandı. Məlumata görə, AYB-nın 21 üzvünə verilən mənzillərin əksəriyyəti 1-2 otaqlıdır. Lakin 3-4 otaqlı mənzillər də var. 21 mənzil əsasən, AYB-nın idarə aparatında çalışanlara, oradan dəfələrlə ev və maşın alanlara verilib. İddialara görə onların arasında elələri var ki, bu, AYB-dən aldığı üçüncü mənzildir. 

Ednews məsələ ilə bağlı qələm əhli arasında sorğu keçirib, yazıçıların bu barədə münasibətini öyrənib. Cavabları təqdim edirik: 

Xalq şairi Sabir Rüstəmxanlı: 

“Bütün ev alanları ürəkdən təbrik edirəm. Yeni evlərində xoşbəxt yaşasınlar. Ev gözləyənlərə də Allah qismət eləsin! Mən bu proseslərdən uzaq olduğuma görə başqa söz deyə bilmərəm”.

Yazıçı Aqil Abbas: 

“Kimliyindən asılı olmayaraq Allah ev alanların hamısına o evlərdə toy etməyi nəsib etsin, xoş günlər keçirsinlər. Hər halda yazıçıları qiymətləndiriblərsə, bundan gözəl nə ola bilər axı?! 20 nəfərin ev aldığı deyilir. 20 nəfər Yazıçılar Birliyinin bir faizi deməkdir. Anlayıram, yazıçılar arasında da pisi-yaxşısı var. Amma dövlət onu sevindirirsə, niyə narazı olmalıyıq?”

Yazıçı Səfər Alışarlı:

“Kitab çapının müstəqilləşməsilə AYB ideoloji yaradıcılıq idarəsindən yazıçıların məişət məsələlərilə məşğul olan bir quruma çevrildi. Sərt kapitalizm rejimində yazıçıların bu quruma ehtiyacı daha da artıb. Ancaq son onilliklərdə məlum səbəblər üzündən bu təşkilata üzvlük məsələsində ciddi problemlər yaranıb. Məncə, əsas iş bu sahədə aparılmalıdır.

Kimlərin necə ev aldığını hamı bilir. İstərdim ki, AYB-də ev siyahısı şəffaflaşdırılsın, rəhbərliyin üzvlər qarşısında hesabatlılığı Nizamnamə qaydalarına və qanuna uyğun olsun”.

Yazıçı Rasim Qaraca:

“Bilirsiniz, AYB-nin fəaliyyətini biz əvvəllər çox tənqid etmişik. Bütün məsələlər gəlib Anarın şəxsində ilişir. Bu adamın həm xalq, həm də hakimiyyət yanında etibarı böyükdür. İstədiyini edə bilər və onu heç kim sorğu-sual etməz. AYB-nin fəaliyyəti şəffaf deyil, 15 ildir prezident təqaüdü verilir, ancaq siyahı açıqlanmır, təqaüd kimlərə verilir, bilinmir. İndi ev məsələsində də belə. Dövlətin ədəbiyyat idarəçiliyi demokratik deyil. Sözün əsl mənasında ədəbiyyatımızın inkişafı, istedadların ortaya çıxması heç kimsə üçün maraqlı deyil. 5 nəfərə ev verib qalanlarını da gözləmə pozisyonunda müti halda saxlamaq sovetdənqalma ənənədir, bu şəkildə yazarları idarə etmək istəyirlər və idarə də edirlər. Məsələ burasındadır ki, yazarlarımızda da ləyaqət hissi qalmayıb, bunun əksi olsaydı baş verən özbaşınalığa etiraz edərdilər. Etiraz edənlər də ev ala bilməyənlərdir, öz şəxsi maraqları üçün bunu edirlər. Nəticə olaraq, ədəbiyyatımızda durğunluq davam edir və belə görünür ki hələ 5 il də davam edəcək, çünki Anar Allahdan 5 il möhlət istəyib”.

Şair Aqşin Yenisey:

“AYB-ni və Anarı Azərbaycanda müstəqillik dövrünün üçüncü nəsli tənqid edir. Mən artıq qocalmışam, gənc yazıçılar danışsın bu barədə”.

Şair Aqşin Evrən:

“Mən zamanında AYB, Xalq yazıçısı Anar haqqında danışmışam, yazmışam, müəyyən məsələlərin düzəldilməsi üçün təkliflər vermişəm. Amma bir neçə ildir, o mövzunu tam bağlamışam. 
Ev alanlara gəldikdə isə hər birinə cansağlığı arzulayıram. Qarğış-filan gördüm, bunlar doğru yanaşma deyil. Aralarında o evə layiq olanlar da var. Amma təbii, tragikomik vəziyyət də yaranıb: evi olub yenidən ev alanlar, haqqı çatmadan alanlar və s.

Əgər yazıçıya, şairə veriləsi mənzil həqiqətən də hansısa sürücüyə, dulusçuya, quşçuya və evləri olanlara verilibsə, görəsən, bu haqda nə demək olar? Bir də evi var ikən başqasının haqqı olan evi alıb onun içində necə rahat yaşamaq olar? 

Şəxsən bu suallar məni noyabrında 20-də dəhşətə gətirir. Bu dəhşətdən çıxmaq üçün birazdan Hərbi Qənimətlər Parkına gedəcəm”.

Yazıçı Orxan Həsəni:

“Azərbaycan yazıçısına ev vermək ədəbiyyata xidmət etmək deyildir. Elə bil ədəbiyyat industriyası qurmaq lazımdır ki, yazıçı yazdığı kitablar ilə evini özü qazansın. Görünür, iş görmək hələ heç kimə sərf etmir. Bu cür addımlar yazıçıları ələbaxan olmağa, mütiləşdirməyə, əzməyə xidmət edir.

Evi olan və ədəbiyyata dəxli olmayan şəxslərin ev almasına gəldikdə isə kim nə istəyir, onu da eləyir. Bu birinci dəfə deyil və Azərbaycan Yazıçılar Birliyi artıq bu sahədə xeyli peşəkarlaşmışdır”.

Oğuz