Motivator Murad Məmmədov öz feysbuk profilindən video paylaşım edib. Belə ki, o banklara zəng edərək I qrup fiziki məhdudiyyətli şəxslər üçün kredit tələbi edib. Lakin bankların heç biri ona müsbət cavab verməyib.
Ednews.net mövzunu diqqətə alaraq Azərbaycanda bir neçə aparıcı bankın mətbuat katibləri ilə əlaqə yaradaraq I qrup fiziki məhdudiyyətli şəxslər üçün kredit məsələsini dəqiqləşdirib. Cavabları təqdim edirik:
"Kapital Bank"ın mətbuat katibi Pərviz Sədrəddinov:
“Bankın müəyyən prosedur qaydaları var. Hansı ki, banklar haqqında qanunla, Mərkəzi Bankın tövsiyələrilə, bəzən tələblərilə nizamlanır. Ona uyğun olaraq qərar verilir”.
“Muğan Bank”ın mətbuat katibi Mir Əvəz Məmmədov:
“Kredit pensiyaya çıxanlara verilir, fiziki məhdudiyyətli şəxslərə isə verilmir. Səbəbini deyə bilmərəm. Kredit komitəsi belə məsələlərlə bağlı qərarlar qəbul edir. Öz tərəfimdən bir söz deyə bilmərəm”.
Digər banklar və Əmək və Əhalinin Sosial Müdafiəsi Nazirliyi sualımızı cavabsız qoyaraq məsələyə laqeydlik göstəriblər.
Mövzu ilə bağlı iqtisadçı-hüquqşünas Əkrəm Həsənovun da münasibətini öyrəndik:
“Sırf bu səbəbdən kreditin verilməməsi deyilən bir şey yoxdur. Qanuna görə hər bir şəxs, hətta Azərbaycan vətəndaşı olmayan şəxs də bankdan kredit götürə bilər. Bank üçün yalnız 2 meyar olmalıdır. Birincisi, verilən kreditdən qanuni məqsədlər üçün, ikincisi də müştərinin krediti qaytarmaq üçün iş qabiliyyətinin olmasıdır. Aydın məsələdir ki, fiziki mədudiyyətli şəxlərin əksəriyyətinin ödəniş qabiliyyəti elə də yüksək deyil, amma hər halda kredit verilə bilər. Təbii ki, burda böyük məbləğdən söhbət gedə bilməz. Qanunda belə bir məhdudiyyət yoxdur. Bank sənin fiziki məhudidiyyətli olduğunu deyib kredit verməyə bilməz, bu qanunsuzdur, qanunvericiliyilə ziddir. Ayrıseçkilikdir, diskriminasiyadır. Bank sırf buna görə vermirsə, onda Antiinhisar və İstehlak Bazarına Nəzarət Dövlət Xidməti bu məsələ ilə məşğul olmalıdır. Həmin bankı cərimələməlidir. Bundan başqa Mərkəzi Bank da sözügedən banklar üçün sanksiyalar tətbiq edə bilər. Murad Məmmədov ona kredit verməyən bankları məhkəməyə verib, ona vurulan mənəvi zərərin əvəzini tələb edə bilər”.