2045-ci ilə qədər Qlobal enerji tələbatı 23% artacaq.
Ednews xəbər verir ki, bunu OPEC-in Baş katibi Haysam Əl-Qays bildirib.
O qeyd edib ki, hazırda bütün enerji növlərinə kifayət qədər investisiya qoyulmur, bu da dünyada qlobal enerji sisteminin dayanıqlılığını təhlükə altına atır. Belə ki, növbəti onilliklərdə əhalinin artması və qlobal iqtisadiyyatın böyüməsi səbəbindən dünyanın daha çox enerjiyə ehtiyacı olacaq.
Dünyanı gözləyən enerji böhranı ilə bağlı Ednews-a açıqlama verən iqtisadçı ekspert Xalid Kərimlinin sözlərinə görə, artıq inkişaf etmiş ölkələr bunun qarşısını almaq üçün hərəkətə keçiblər:
.jpg)
“Dünya hazırda alternativ enerji istehsalı sahəsinə diqqətini artırır. Neft hasilatı ilə məşğul olan ölkələrə baxdıqda görə bilərik ki, onlar həm də ən böyük alternativ enerji istehsal edən ölkələrdir. Səudiyyə Ərəbistanı, Birləşmiş Ərəb Əmirlikləri, Norveç bu sahədə irəliləyiş əldə edib. Azərbaycan özü də alternativ enerji mənbələrindən istifadəyə can atır və bu yöndə investisiyalarını artırmağa çalışır. “ACWA Power”, “Masdar”, “BP” dünyada bu sahədə ən böyük şirkətlər sırasındadır. Dünyada böyük enerji böhranının olacağına dair tez-tez açıqlamalar eşidirik. Düşünürəm ki, narahatlığa səbəb yoxdur. Külək enerjisi, hidrogen enerjisi, günəş enerjisi, atom enerjisi, su enerjisindən səmərəli istifadə etmək lazımdır. İnkişaf etmiş ölkələr bu alternativ enerji sahələrinin inkişafına nail olmağa çalışırlar. Avtomobil sahəsində elektrik mühərrikli avtomobillər artıq ənənəvi avtomobilləri əvəz edir. Dünya ölkələri bu problemi həll etmək üçün çoxdan qollarını çırmalayıblar”.
Törə Zeynal
