Böyük Britaniya Baş nazirinin Azərbaycan üzrə ticarət elçisi Baronessa Emma Nikolson ölkəmizdə səfərdədir.
Jurnalistlərə açıqlamasında iki ölkə arasındakı iqtisadi münasibətlərə toxunan Baronessa Emma Nikolson bildirib ki, Böyük Britaniya bərpa olunan enerji mənbələrinin inkişafında Azərbaycana dəstək verməyə hazırdır.
O qeyd edib ki, Azərbaycanın ənənəvi enerji mənbələri ilə yanaşı, bərpa olunan enerjiyə doğru irəliləməsi artan dünya əhalisinin tələblərinin qarşılanması baxımından vacibdir.
Britaniyalı ticarət elçisi həmçinin ölkəsinin bu sahədə təcrübə və biliyini Azərbaycanla bölüşməyə hazır olduğunu da vurğalyıb.
Baronessa Emma Nikolsonun açıqlamasına münasibət bildirən enerji məsələləri üzrə ekspert İlham Şaban bildirib ki, gələcəkdə iki ölkə arasında bərpolunan enerji sahələri üzrə əməkdaşlıq daha da inkişaf edə bilər. Gələcək əmədaşlığın perspektivlərindən danışan ekspert Ednews-a açıqlamasında bunun işğaldan azad olunan torpaqlarımızda gedən bərpa işlərinə də təsirsiz ötüşməyəcəyini qeyd edib:
“Baranessonun bu bəyanatı Böyük Britaniya hökumətinin maliyyə və texnologiya sahəsində Azərbaycana dəstək verə biləcəyini önə çəkib, təbii ki, biz bundan yararlanmaq istəsək. 2021-ci ildə BP şirkəti ilə Azərbaycan Energetika Nazirliyi arasında Cəbrayıl və Zəngilan rayonlarının ərazisində “Şəfəq” günəş elektrik stansiyasının tikintisinə dair memorandum imzalandı. Bu əməkdaşlıq günəş enerji layihəsinin texniki və kommersiya aspektində qiymətləndirilməsi, stansiyanın layihələndirilməsi, maliyyələşdirilməsinin təmin edilməsi və yekun investisiya qərarının qəbulu kimi istiqamətləri əhatə edirdi. Hesab edirəm ki, Azərbaycan hökuməti sözügedən stansiyanın maliyyələşməsində Britaniya fondları və ya digər maliyyə qurumlarından dəstək ala bilər. Hələki BP-dən başqa hansısa Britaniya şirkəti Azərbaycanda yaşıl enerji ilə bağlı sahəyə yatırım etməyə maraq göstərməyib”.
Törə Zeynal
