Qərb dövlətləri tərəfindən Rusiyaya tətbiq edilən növbəti sanksiya paketinə əsasən ölkənin Avropa banklarındakı aktivlərinin rəsmi şəkildə Ukraynaya göndərilməsinə başlanıb. Hələ məsələnin Aİ-da müzakirəsi zamanı rəsmi Moskva bunun ağır nəticələr ilə bitəcəyini bildirərək Qərbə xəbərdarlıq edib.
Avropa və ABŞ həqiqətən də, Ukraynaya dəstək vermək üçün Rusiyanın vəsaitlərinə ehtiyac duyur?
Məsələ ilə bağlı Ednews-a danışan rusiyalı politoloq Vitali Arkov Qərbin Kiyevə kömək etmək bəhanəsi ilə maddi vəsaitləri oğurladığını iddia edib:
"Rusiyaya qarşı görülən bu tədbirlər tamamilə qanunsuzdur. Bu sadəcə olaraq oğurluqdur, Ukraynaya yardım etmək isə bəhanədir. Rusiya hesablarından götürülmüş böyük məbləğlər rəsmi şəkildə Kiyevə göndərilsə də, heç Avropa İttifaqı yurisdiksiyasından kənara çıxan deyil.
Başqa sözlə desək Rusiyanın maddi vəsaitləri Avropanın hərbi-texniki müdafiə sənaye komplekslərinə xərclənəcək. Avropa dövlətlərinin hərbi baxımdan hazırlıqsız olması bunu sübut edir. Bu dövlətlərin ordularında çox ciddi problemlər var. Buna görə də göndərilən maddi vəsaitlərin çoxu Qərbə geri qayıdır. Lakin, bu proses qeyri-rəsmi şəkildə başa tutduğu üçün qazanan pərdəarxası siyasətçilər olur”.
Xarici politoloq bildirib ki, Rusiya çoxsaylı sanksiyalara və bank vəsaitlərinin dondurulmasına çox sərt cavab verərək bunu özünün iqtisadi üstünlüynə çevirəcək:
"Bank aktivlərinin oğurlanmasına Moskva təbii ki, səssiz qalmayacaq. Rusiyada fəaliyyət göstərən bir çox Avropa şirkətləri mövcuddur. Bu şirkətlər müharibədən sonra öz maddi vəsaitlərini Rusiyadan çıxarmağa çalışıblar. Moskva bu kimi şirkətləri milliləşdirə və vəsaitlərə əl qoya bilər. Biz burada çoxsaylı daşınmaz əmlak, zavod, fabrik, nəqliyyat vasitələri və milyardlarla pul vəsaitindən danışırıq.
Qərbin bu qeyri-qanuni addımları, tarixdə praktiki səhv kimi xatırlanacaq. Bu onlara daha böyük zərər kimi geri dönəcək. Məsələyə təkcə Rusiya perspektivindən baxmaq lazım deyil, onun müttəfiqləri: İran, Brazilya, Çin və Hindistan kimi dövlətlər bu oğurluq aktına cavab kimi Qərbə sanksiya tətbiq edə bilərlər. Avropa dövlətləri hazırda “Pandora qutusu”nu açır və onların iqtisadiyyatı buna hazır deyil”.
Fərid
