"Azərbaycan və Pakistan arasında çox yaxşı münasibətlər mövcuddur. Xüsusilə də son dövrlərdə qarşılıqlı dövlət və işgüzar səfərlərin artması onu deməyə imkan verir ki, hər iki dövlət öz potensialını birlikdə istifadə etməyə və güclərini birləşdirməyə qərarlıdır".

“EDnews” xəbər verir ki, bu fikirləri  Millət vəkili Naqif Həmzəyev Pakistanın Baş naziri Məhəmməd Şahbaz Şərif Azərbaycana rəsmi səfərini və iki ölkə arasındakı münasibətləri şərh edərkən bildirib.

O qeyd edib ki, energetika, infrastruktur, mədənlərin işlənməsi və digər sahələr üzrə sərmayə qoyuluşu real görünür:

“Möhtərəm cənab Prezident İlham Əliyevin bundan əvvəlki Pakistan səfəri zamanı əldə edilmiş bir çox razılaşmalar var. Azərbaycanın Pakistana iki milyard ABŞ dolları sərmayə qoymasını planlaşdırması barədə xəbərlər isə artıq verilib. Pakistan baş nazirinin Azərbaycana səfəri zamanı, xüsusilə də mətbuata verdiyi açıqlamalarda daha dəqiq məlum oldu ki, cənab Prezident məhz bu sərmayələrin qoyuluşu ilə əlaqədar tədqiqat mərhələsinin tamamlanması üzərində çalışıldığını vurğuladı. Bir ay ərzində bu araşdırmalar yekunlaşacaq və məsələlərə real yanaşılaraq sənədlərin imzalanması baş tuta bilər. Əsasən də Azərbaycanın energetika, infrastruktur, mədənlərin işlənməsi və digər sahələr üzrə sərmayə qoyması real görünür. Bu isə o deməkdir ki, Azərbaycan həm Pakistanın inkişafına, həm də Pakistandakı potensialın qarşılıqlı istifadə edilməsinə maraqlıdır”.

N.Həmzəyev bildirib ki, bütün beynəlxalq təşkilatlarda və forumlarda Azərbaycan və Pakistan birlikdə addım atır:

“Pakistan Azərbaycanın ən yaxın dostu hesab etdiyi dövlətlərdəndir. Necəki Qarabağ məsələsi ilə bağlı Azərbaycan ərazilərinin işğalı zamanı Pakistanın haqlı mövqeyi var idi və Azərbaycanın mövqeyini 100% dəstəklədilər, 44 günlük Vətən müharibəsi zamanı da Pakistanın Azərbaycana tam dəstəyini hiss etdik və bu dəstək bu gün də davam edir. Azərbaycan da eyni zamanda Pakistanın bütün problemlərini öz problemləri kimi qəbul edərək Pakistana sonsuz dəstəyini nümayiş etdirir. Bir sözlə, Azərbaycan və Pakistanın ortaq mövqedən çıxış etməsi imkan verir ki, digər sahələr üzrə də mövqelərimiz üst-üstə düşsün və mümkün imkanların birlikdə istifadəsi üçün güclərimizi səfərbər edək”.

Millət vəkili qarşılıqlı dəstək və etimad nümayiş etdirərək gücümüzü artırmalı olduğumuzu qeyd edib:

“Bu baxımdan Azərbaycan-Pakistan münasibətlərinin çox böyük potensialı var və bu potensialın artırılması, inkişaf etdirilməsi üçün hər iki dövlət rəhbərinin səylərini görürük və buna sevinirik. Xüsusilə də son dövrlərdə pakistanlı turistlərin Azərbaycana səfərlərinin artması, birbaşa reyslərin baş tutması, eyni zamanda azərbaycanlıların da Pakistana maraq göstərməsi onu deməyə imkan verir ki, yaxın gələcəkdə hər iki dövlət arasında potensial tam dəyərləndirilərək əlaqələr daha da inkişaf etdirilə və gücləndirilə bilər”.