Azərbaycan Pediatriya Cəmiyyəti (AzPC), Ümumdünya Səhiyyə Təşkilatı (ÜST) və Tibbi Ərazi Bölmələrini İdarəetmə Birliyi (TƏBİB) oktyabrın 27-də Avropa İttifaqının maliyyə dəstəyi ilə Şirvan Şəhər Mərkəzi Xəstəxanasında peyvəndlənmə ilə bağlı maarifləndirmə tədbiri keçirib.

“Report”un Aran bürosunun məlumatına görə, “Mifə yox, elmi sübutlara inanaq: Peyvəndlə bağlı biliklərin artırılması üzrə təlim” adı ilə keçən tədbir ÜST-nin Səhiyyə Nazirliyi və İcbari Tibbi Sığorta üzrə Dövlət Agentliyi ilə də apardığı sıx əməkdaşlıq çərçivəsində təşkil olunub. Təlim ÜST-nin “Avropa İmmunlaşdırma Gündəliyi 2030” təşəbbüsünə uyğun olaraq “Heç bir uşağı peyvənddən kənarda qoymayaq” şüarı altında keçirilib.

Təlimin məqsədi tibb işçilərinin və valideynlərin peyvəndlənmə ilə bağlı məlumatlılığını artırmaq, doğru bilinən yanlışlıqlara aydınlıq gətirmək və xəstəliklərdən qorunmaqda vaxtında vurulan peyvəndin əhəmiyyətini elmi sübutlar əsasında diqqətə çatdırmaqdır.

Tədbirdə AzPC-nin İdarə Heyətinin sədri Erkin Rəhimov, ÜST-nin Azərbaycandakı ölkə ofisinin “Vaksinasiya Dəstək” layihəsinin rəhbəri Sevinc Həsənova, TƏBİB-in Davamlı tibbi təhsil şöbəsinin müdiri Nahidə Mahmudova, Səhiyyə Nazirliyinin Səhiyyə siyasəti şöbəsinin ana və uşaqların sağlamlığının qorunması sektorunun müdiri Aynurə Zeynalova, UNICEF-in mütəxəssisi Vəfa Ağayeva və Şirvan Şəhər Mərkəzi Xəstəxanasının direktoru Pərviz Rüstəmov çıxış edərək peyvəndin uşaqların sağlamlığının qorunmasında mühüm rola malik olduğunu vurğulayıblar. Mütəxəssislər valideynlərə və tibb işçilərinə müraciət edərək bu məsələdə uşaqlara qarşı daim diqqətli olmağı və peyvəndlə bağlı rəsmi, etibarlı mənbələrə etibar etməyi tövsiyə ediblər.

Daha sonra tədbirin birinci hissəsində Şirvan şəhərində yaşayan və peyvənd vaxtını gecikdirən 7 yaşa qədər uşaqların valideynləri ilə görüş keçirilib.

Günün ikinci yarısında isə AzPC-nin mütəxəssisləri tibb işçiləri üçün peyvəndlə əlaqədar mühüm mövzularda sessiyalar keçirərək geniş məlumat veriblər. Sessiyalar rutin vaksinasiya, peyvənd tərəddüdü, peyvəndlə qarşısı alına bilən müxtəlif xəstəliklər üzrə mövzuları əhatə edib. Bundan başqa, tibb işçilərinin peyvəndlənmə ilə bağlı biliklərini yoxlamaq və tədbirin səmərəliliyini qiymətləndirmək məqsədilə təlimdən əvvəl və sonra onlayn test keçirilib.

Tədbirdə Şirvan Şəhər Mərkəzi Xəstəxanası, həmçinin Sabirabad, Salyan, Biləsuvar, Neftçala, Hacıqabul, İmişli və Kürdəmir rayon mərkəzi xəstəxanalarının, eyni zamanda bu bölgələrdə yerləşən bir sıra dövlət tibb müəssisələrinin pediatrları, terapevtləri, vaksinatorları və tibb bacıları iştirak ediblər.

Sonda valideynlərə və tibb işçilərinə sertifikatlar təqdim olunub.

Qeyd edək ki, maarifləndirmə tədbiri növbəti aylarda Avropa İttifaqının dəstəyi ilə ÜST, AzPC və TƏBİB tərəfindən ölkənin 5 şəhərində yenidən təşkil olunacaq.