“Biz gənclərin seçimlərinə müdaxilə etmirik, onlara yardım edirik” - ANTEC akademiyasının direktoru Günay Hüseynli ilə MÜSAHİBƏ - ednews.net

“Biz gənclərin seçimlərinə müdaxilə etmirik, onlara yardım edirik” - ANTEC akademiyasının direktoru Günay Hüseynli ilə MÜSAHİBƏ

26.05.2023 12:31 Müsahibələr A- A A+

Müsahibimiz ANTEC – Agile Networks Training and Education Center-in direktoru Günay Hüseynlidir. Yeni açılan ANTEC Academy IT və Proqramlaşdırma sahələri üzrə bütün incəlikləri gənclərə xüsusi metodika ilə öyrətməyə iddialıdır.

Günay Hüseynli akademiyanın ən qısa zamanda Azərbaycanda öz dəsti – xətti ilə yadda qalacağına böyük ümidləri var. Çünki o, gənclərə ən əsası komandada çalışmağı öyrədəcək.

Beləliklə, maraqlı söhbətimiz başlayır:

-Bizə maraqlıdır, niyə ANTEC? Bu adın mənası nədir?

-Hazırda, bazarda proqramlaşdırma və İT sahəsi üzrə ən məşhur metodika, Agile metodikasıdır. Günümüzdə bir çox sektorlarda, o cümlədən, bank sektorunda bu proqram tətbiq olunur. Agile- iş prinsipidir. Agile proqram təminatlarının hazırlanması, İT lahiyələrin icrası və inkişaf etdirilməsi üzrə kiçik komandalar, eləcə də böyük təşkilatlar tərəfindən istifadə olunan çevik idarəetmə metodudur. Bizi fərqləndirən cəhət də təlimlərimizdə bu metodu tətbiq etməyimizdir. Mərkəzdə proqram təminatlarının işlənib hazırlanması və İT layihələrin idarə olunmasına dair bilik və bacarıqların öyrədilməsi ilə yanaşı, tələbələrin gənc mütəxəssis kimi hazırlanması üçün əlavə təlimlərin keçirilməsi, komandada çalışmaq mədəniyyətinin mənimsədilməsi nəzərdə tutulur və Agile prinsipi təbliğ olunur. Onlar texniki biliklərlə yanaşı, eyni zamanda yumşaq bacarıqlara da yiyələnir. Bununla da onların komandada işləmə qabiliyyətləri, ünsiyyət saxlamaq bacarıqları, sərbəstliyi bir fərd olaraq iş keyfiyyətinə də təsir edir.

-Yəni iddia edirsiniz ki, adınızında da əks olunan bu fərqlilik, eyni zamanda, sizi IT sahəsi üzrə təlimlər verən digər mərkəzlərdən fərqləndirir?

-Bəli, biz istiqamətimizi bu yöndə tutmuşuq. Komanda işi kommunikativlik,sərbəstlik bu kimi məsələlərə önəm veririk. Kursumuzu bitirən tələbə, artıq yüksək keyfiyyətli bir mütəxəssis kimi bizim yönləndirdiyimiz müəssisələrdə çalışa biləcək. Bu gün siz iş elanlarına da baxdıqda, görərsiniz ki, qoyulan tələblər tək IT sahəsi üzrə deyil. Bütün iş elanlarında şirkətlər, komandada işləmək bacarığı da tələb edir. Çünki komanda da bir nəfər bu keyfiyyətlərə malik deyilsə, ümumi iş keyfiyyəti də aşağı düşür. Deyək ki, bir iş görülürsə, onun düzgün planlanması aparılıbsa, bu artıq işin 50% uğuru deməkdir. Bölgülər zamanı komandada biznes analitik, layihə meneceri, web-dizayner, məhsul sahibi, developerləri, DevOps mühəndisləri və komandanın digər üzvləri rolları üzrə işləməyə başlayır. Hər kəsin öz texniki tapşırığı olur. Keyfiyyətli məhsul ərsəyə gətirmək üçün yüksək səviyyəli komanda işi lazımdır. Bizim əsas missiyamız da, komandada çalışmağı bacaran və müasir əmək bazarının tələblərinə cavab verən mütəxəssis yetişdirməkdir.

-Özünüzün də qeyd etdiyiniz kimi mütəxəssislərin hazırlanması məqsədi ilə ANTEC Akademiyası hansı addımları atır və ya gələcək üçün planlarınız nədir?

-Dərslərimiz xüsusi metodika ilə keçirilir. Keçəcəyimiz hər dərs, nəzəri və praktiki hissədən ibarətdir. Bu məqam, Faydalı İş Əmsalının (FİƏ) artmasına, keyfiyyətli tədrisin reallaşmasına zəmin yaradır. Tədris müddətində aydın olmayan, anlaşılmayan dərslərin yenidən keçirilməsi tələbələr üçün növbəti müsbət məqam kimi dəyərləndirilə bilər. Bütün xidmət sahələrində olduğu kimi, tədris sahəsində də “kəmiyyət-keyfiyyət” problemi həmişə aktuallığını qoruyub saxlayıb. Keçirilən dərslərdə çox sayda tələbənin iştirak etməsi keyfiyyəti xeyli aşağı salır. Mütəxəssislərimizin rəyinə əsasən, dərslərdə ən çox 8 tələbənin iştirakını uyğun hesab etdik, lakin biz “Antec Academy” olaraq bu rəqəmi bir az da azaltmağı düşünürük. Limit qorunub saxlanıldığı müddətdə, keyfiyyət özünü göstərəcək, bu səbəbdən dərs otaqlarında 6 tələbə ilə tədrisi reallaşdırmaq nəzərdə tutulub. Onu da vurğulaya bilərəm ki, bu gün bizdə, təlimləri keçənlər müəllimlər deyil, sırf bu sahə üzrə çalışan mütəxəssislərdir. Bunun səbəbi var: Mütəxəssis hər gün fərqli alternativlər tapmaq məqsədi ilə araşdırmalar edir, daima öyrənməyə səy göstərir. Nəticədə, onlar öyrəndiklərini tələbələrə daha detallı formada mənimsədə bilirlər. Bu, tələbələr üçün olduqca vacibdir. Bunlarla yanaşı, tələbələrə, texnologiya sahəsində fəaliyyət göstərən şirkətlərdə təcrübə keçmək üçün, şərait yaradacağıq və real iş mühiti ilə tanış edəcəyik.

-Akademiyanın burada təlim keçən gəncləri şirkətlərə göndərməyə imkanı varmı?

-Bəli. İT sahəsi üzrə ixtisaslaşan şirkətlərlə memorandumlar, müqavilələr imzalanır. Əməkdaşlıq etdiyimiz şirkətlərin sayı gündən-günə artır. Məsələn, Azfibernet, Netpoint kimi provayder şirkətləri ilə artıq müqavilə bağlamışıq. Hətta, bir neçə tələbəmizi real iş mühiti ilə tanış etmişik. Belə şirkətlər, həm də bizi lazımi avadanlıqlarla təmin edirlər. Bizim təlim mərkəzimizdə hazırda CİSCO avadanlıqları var. Bu tələbələri daha çox cəlb edir. Ofisimizdə tanış olduqları avadanlıqları, iş mühitində gördükləri zaman tələbələr artıq bunlar haqqında məlumatlı olurlar.

-Akademiyada hansı təlimlər keçirilir?

-Bizdə hazırda “Frontend Proqramlaşdırma”, “DevOps Engineering Cloud”, “C# Backend Proqramlaşdırma”, “JAVA Backend Proqramlaşdırma”, “Network Administration”, “Linux Administration”, “Windows Administration”, “UX/UI Dizayn”, “QrafikDizayn”, “Oracle SQL & PL SQL”, “Algoritms& Data Structures”, “IT Support & Help Desk (Basic Networking Skills)”, “Product Management & IT Business Analyst” və günümüzdə ən çox tələbat olan “Kibertəhlükəsizlik” üzrə təlimlər keçirilir. Lakin IT və proqramlaşdırma ümumiyyətlə, ayrı-ayrı sahələrdir. Tələbələr bizə müraciət etdiyi zaman, bəzən onlar arasındakı fərqi bilmirlər. Bu səbəbdən, akademiyamıza müraciət edən tələbə ilə söhbət edib, onun maraqlarını, şəxsi keyfiyyət və bacarıqlarını müəyyən etməyə çalışırıq,mütəxəssislərlə görüş təşkil edirik, demo-dərslərə cəlb edirik. Düşünürük ki, belə bir kompleks yanaşma, bizə tələbəni düzgün istiqamətləndirməyə kömək edəcək, gələcəkdə peşəsində özünü xoşbəxt hiss edən kadrların sayının artmasına səbəb olacaq.

-Deməli əvvəlcədən təlim istiqamətini düzgün seçməkdə, gənclərə kömək edirsiniz.

-Biz onların seçimlərinə müdaxilə etmirik, əgər seçiminə kömək etməyə icazə verirsə, ona yardım edirik. Bu gün gənclərin çətinlik çəkdiyi əsas məsələ budur ki, onlar hara yönələcəklərini bilmirlər. Onların kifayət qədər potensialları var, amma özlərini tapana qədər çox pul xərcləmiş olurlar, həm də çox vaxt itkisi olur.

-Bu gün bazarda kifayət qədər IT və proqramlaşdırma ilə bağlı bir sıra çatışmazlıqlar var. İstərdim ki, bu barədə də danışaq. Bunu necə aradan qaldırmaq olar?

-Burada əsas problem, nəzəriyyə ilə praktikanın üst-üstə düşməməsidir. Bu mənada, bizim kimi tədris və təlim mərkəzlərinin borcu, yüksək peşəkar kadrlar hazırlamağa mükəlləf olan ali məktəblərimizə dəstək verməkdir. Bir neçə ali məktəb ilə artıq danışıqlar aparılır. İstər nəzəri, istər praktik formada onlara dəstək verməklə bağlı, ilkin razılıqlar əldə etmişik. Biz belə hesab edirik ki, bu gün informasiya müharibəsi şəraitində olan vətənimizə, IT sahəsində yüksək praktik kadrların hazırlanması yönündə maksimum dərəcədə dəstək olmalıyıq. Hətta mən belə deyərdim ki, Antec Akademiyasının rəhbəri olaraq, bu mənada biz heç bir maddi qazanc güdmürük. Bizim məqsədimiz, sırf ali məktəblərdə İnformasiya texnologiyaları və Proqramlaşdırma sahələri üzrə tədris alan tələbələrə maksimum dərəcədə dəstək vermək, onların yanında durmaq və gələcəkdə Azərbaycanın informasiya təhlükəsizliyinin təmin edilməsi yönündə yüksək, peşəkar kadrların hazırolunmasında öz töhfələrimizi verməkdir. Çünki informasiya təhlükəsizliyi, milli təhlükəsizliyimizin ən vacib komponentidir!

Aysel Şahmar

Mətndə səhv varsa, onu qeyd edib Ctrl+Enter düyməsini basaraq bizə göndərin.

Bizi izləyin:
Twitter: @EurasiaAz
Facebook: EurasiaDiaryAzerbaycan
Telegram: @eurasia_diary

Загрузка...

“Biz gənclərin seçimlərinə müdaxilə etmirik, onlara yardım edirik” - ANTEC akademiyasının direktoru Günay Hüseynli ilə MÜSAHİBƏ - ednews.net

“Biz gənclərin seçimlərinə müdaxilə etmirik, onlara yardım edirik” - ANTEC akademiyasının direktoru Günay Hüseynli ilə MÜSAHİBƏ

VİDEO