Xəbər verdiyimiz kimi, İsrail Dövlətinin Prezidenti Yitzhak Hersoq mayın 30-da Azərbaycan Respublikasına rəsmi səfərə gəlib. Hər iki ölkənin dövlət bayraqlarının dalğalandığı Heydər Əliyev Beynəlxalq Aeroportunda ali qonağın şərəfinə fəxri qarovul dəstəsi düzülüb.
İsrail prezidenti İsxak Hersoqun Azərbaycana səfərinin hansı prespektivləri olacaq? Bu səfər Azərbaycan Ermənistan arasındakı sülh danışığına da töhfə verə bilərmi?
Səfərlə bağlı Ednews-a danışan israilli ekspert, ictimai və siyasi xadim Barux Leviev bildirib ki, İsrail prezidentinin Azərbaycana səfəri iki ölkə arasında ikitərəfli münasibətlərdə əlamətdar hadisədir və bu qəbildən olan səfər müxtəlif sahələrdə əməkdaşlığı gücləndirir:
“Bu qəbildən olan səfər müxtəlif sahələrdə, məsələn, siyasət, iqtisadiyyat, mədəniyyət, təhlükəsizlik və s. sahələrdə diplomatik əlaqələrin və əməkdaşlığın gücləndirilməsi deməkdir. İsrail prezidentinin səfəri dövlət siyasətinin vacibliyinə işarə ola bilər. Tərəfdaşların tərəfi və bütün sahələrdə əlaqələri gücləndirmək istəyini də qeyd edərdim. Bununla bağlı bir sıra çox vacib məqamları və amilləri də əlavə etmək istərdim. Prezidentimizin xüsusi statusu var. O, Millət və Birlik rəmzidir. O, nüfuz sahibi olan və İsrail ideallarının ümumbəşəri dəyərlərini təmsil edən xalqımızın və ölkəmizin simasıdır və o, həm də milli birliyin möhkəmləndirilməsi, demokratik prinsiplərin qorunması kimi bir sıra çox mühüm funksiyaları yerinə yetirir”.
Sonda L.Barux bildirib ki, əməkdaşlığın böyük potensialı var və onu daha da inkişaf etdirmək lazımdır.
“Azərbaycanla İsrail arasında əməkdaşlıq həqiqətən də geniş potensiala malikdir və o, bütün sahələrdə, müxtəlif fəaliyyət sahələrində daha da inkişaf etməlidir. Onu da xatırlatmaq istərdim ki, bu yaxınlarda mən Azərbaycanın İsraildə səfirliyinin açılışında iştirak etmişəm və həqiqətən də bu illər ərzində görülən işlər nəhayət özünü hiss etdirir və mənimlə birgə mərasimdə iştirak edənlərin hamının yaşadığı bu müsbət emosiyaların fırtınasını çatdırmaq mənim üçün çox çətindir. Biz diaspor, ictimai xadim olaraq nə olursa-olsun belə görüşlərin baş tutması üçün böyük səylər göstərməyə davam edirik və görülən işlərin nəticəsindən sadəcə sevinib həzz alırıq”.
Nurlana Hacıyeva
