Sentyabrın 27-də “Laçın” dövlət sərhədindən buraxılış məntəqəsində Dövlət Sərhəd Xidmətinin hərbi qulluqçularının sayıqlığı nəticəsində ölkə ərazisinə qeyri-qanuni gələrək qondarma “Dağlıq Qarabağ Respublikasının Dövlət naziri” vəzifəsində çalışmış Ruben Karleni Vardanyan Azərbaycan Respublikasından Ermənistan istiqamətində hərəkət edərkən saxlanılıb.

Bəs Vardanyanın saxlanılması ermənilər tərəfindən necə qarşılanır? Hansı tədbirlər görülə bilər? Ümumiyyətlə, ermənilər Vardanyanın Ermənistana qaytarılmasına və yaxud Rusiyaya ötürülməsinə maraqlıdırlarmı?

Məsələ ilə bağlı Ednews-a danışan erməni siyasi fəal İşxan Verdyan ermənilərin Vardanyandan nifrət etdiyini vurğulayıb:

“Ermənilərin Ruben Vardanyana münasibəti son dərəcə mənfidir. Vardanyan yeganə “cəsarətli adam” idi ki, erməni televiziya studiyasında oturaraq bəyan edirdi ki, Ermənistan ya özü Rusiyanın tərkibinə daxil olmalıdır, ya da bu Rusiya tərəfindən işğalla baş verəcək. Bunu deməklə Vardanyan Tatarıstanın Rusiya Federasiyasının tərkibində uğurlu milli qurum kimi Ermənistanın taleyini proqnozlaşdırırdı və bundan sonra xalq arasında “Tatar Rubo” ləqəbini aldı”.

Fəal düşünür ki, Ermənistan rəsmi hakimiyyət orqanları Qarabağla bağlı olanlara rəğbət bəsləyir. Ona görə də, Vardanyanın azad olunması üçün əlindən gələni edəcəkdir.

“Ermənistanda insanlar Vardanyanın kim olduğunu, kimə qulluq etdiyini, haradan gəldiyini və nə etməyi planlaşdırdığını çox gözəl anlayır, ona görə də Ermənistan vətəndaşları arasında Vardanyanın hər hansı nüfuzundan danışmağa ehtiyac yoxdur. Digər tərəfdən, Ermənistanın rəsmi hakimiyyət orqanlarının Qarabağla bağlı olanlara öz xüsusi münasibəti var. Ona görə də biz hələ də Ermənistan XİN- in “etnik təmizləmə” ilə bağlı standart ifadələr və xüsusilə Vardanyanın tutulması haqqında bəyanatları ilə qarşılaşacağıq”.

Əkbər Novruz