Azərbaycanda vətəndaşların daşınmaz əmlak sığortasına soyuq münasibəti ərazilərdə bir çox tikililərin sığortasız qalmasına şərait yaradıb. Regionlarda evlərin sığortalanmasına maraq niyə azdır? 

Məsələ ilə bağlı Ednews-a danışan əmlak məsələləri üzrə ekspert Ramil Osmanlı problemi paytaxtda 15 mindən çox qanunsuz tikilinin olması ilə əlaqələndirib:

“İnsanlar daşınmaz əmlak növlərini sığortalamaqdan çox zaman yayınırlar. Bunun əsas səbəbi insanların çox vaxt bu işin ciddiyətini anlamamasındır. Qanunvericilik bazasının lazımi səviyyədə olmaması da öz növbəsində buna təsir edir. İcra hakimiyyəti orqanları vaxtı-vaxtında lazımi tədbirlər həyata keçirmirlər ki, bu da vətəndaşların sığortalanma ilə bağlı bir çox yeniliklərdən xəbərsiz qalmasına təkan verir. Azərbaycanda sığortalanmanın bu cür gec və qeyri-səmərəsiz şəkildə həyata keçirilməsinin başqa bir səbəbi də qanunsuz tikililərin sayının çox olmasıdır. Təkcə Bakıda 15 mindən çox qanunsuz tikili mövcuddur ki, onların sığortalanmasını heç bir qanun dəstəkləmir. Mülki məcəllənin 80-ci maddəsinə aid olan bu tikililərlə bağlı dövlət tərəfindən yeni qərarın qəbul olunması gözlənilir. Bu məsələdə ən böyük problem odur ki, vətəndaşlar demək olar ki, sığorta şirkətlərinə güvənmirlər.”. 

İnsanların daşınmaz əmlak sığortasına cəlb olunması haqqında işlərin görülməsi haqqında danışan ekspert qeyd etdi ki, riskli ərazilərdə tikilən evlərin sayının çox olmasıdır: 

"Bu tikililərin faktiki olaraq sığortalanmasını nə dövlət, nə də şəxsi sığorta şirkətləri qarşılayır. Ərazilərdə tikililərin lokallaşdırılması üzrə 2019-cu il dövlət sərəncamı verilib ki, burada faktiki olaraq yaşayış üçün uyğun olmayan ərazilərin qeydə alınması və bu yerlərdə mövcud olan tikililərin başqa ərazilərə köçürülməsi aiddir. Əlavə olaraq, vətəndaşları sığortalanma ilə təmin etmək üçün bir sıra cərimə növləri hazırlanıb. Lakin, cərimələrin tətbiq edilməsi özünü hələ ki, doğrultmayıb. Mən düşünürəm ki, icbari sığortanın diferensiallaşmasının təmin olunmasına ehtiyac var. Misal üçün, Bakı şəhərində maksimum sığorta ödəniş məbləği 25 min manatdır. Buna baxmayaraq, şəhərdəki bir çox tikililərin təmirini belə bu məbləğ qarşılamır. Bu halda sahibkar sığortalanmanın onun xeyrinə olmayacağını düşünərək bundan yayınır. Bir məsələni də əlavə etmək istərdim ki, vətəndaşları sığortaya cəlb etməyin ən yaxşı yolu yerli icra hakimiyyətlərində bu barədə insanların məlumatlandırılmasıdır”.

Fərid Axund