Mediada qadın jurnalistlərin rolu və təsiri əhəmiyyətli bir məsələdir.
Qadın jurnalistlər, müxtəlif fikirləri və təcrübələri əks etdirərək mediada çeşidliliyin artmasına və müxtəlif əhval-ruhların səslənərini eşitməyə kömək edir.
Dünyada qadın jurnalistlərə münasibət necədir? Qadın jurnalistlərin üzləşdiyi məhdudiyyətlər hansılardır? Qadın jurnalistlər üçün gender ayrıseçkiliyi varmı?
Mövzü ilə bağlı Ednews – a TNS Xəbər Agentliyinin baş redaktoru Gülşən Hacıyeva, qadınların mövzulara soyuqqanlı yanaşa bilmədiyini söyləyib:
“Ümumiyyətlə, bütün peşələrin qadınlar və kişilər üçün çətinliyi var. Jurnalistika isə spesifik sahələrdən biridir.
Xəbərin, hadisənin, saatı və vaxtı olmadığı üçün adətən jurnalistlərin də sabit iş qrafiki olmur.
Bu sahənin ən ciddi çətinliyi budur. Qadın və kişi jurnalistlərin fərqinə gəlincə, qadınlar daha emossional, həssas olduqlarından bəzən olaylara soyuqqanlı yanaşmaya bilirlər. Xüsusilə, fövqəladə hallarda, böhran vəziyyətlərində, müharibə şəraitində qadınlar hisslərini daha çox önə çıxarırlar. Nəticədə belə hadisələrin təsiri qadınlarda daha uzun çəkə bilər”.
Baş redaktor əlavə olaraq vurğulayıb ki, qadınlara yüklənən əlavə işlər jurnalistikada çətinlik yaradır:
“Bir məsələ daha var ki, ailələrin ev işləri daha çox qadınların üzərində olur.
İşləyən qadın üçün bu, diskomfort yarada bilər. Jurnalistikada yuxarıda qeyd etdiyim kimi, iş qrafiki sabit olmadığından qadınlar daha çox çətinlik çəkirlər.
Mən ayrı-seçkiliyin sadəcə bir sahə ilə məhdudlaşdırılmasının tərəfdarı deyiləm.
Hər sahədə, hətta evdar xanımların gündəlik həyatlarında ayrı-seçkiliklə üzləşməsi normal hala çevrilib.
Buna görə də düşünürəm ki , cinsi ayrı-seçkiliyin sadəcə jurnalistikada yox bütün peşə sahələrində mövcuddur”.
Xəyal Ramiz