İqtisadiyyatın mühüm sektorlarından biri də daşınmaz əmlak bazarıdır. Lakin son dövrlərdə qiymət artımı əhali tərəfindən böyük narazılığa səbəb olub. Bununla yanaşı kirayə ev qiymətləri də paralel olaraq durmadan artır. Ortalama aylıq maaşa nisbətdə kirayə və ev qiymətlərinin yüksəlməsinə əsas səbəb nədir?
Məsələ ilə bağlı əmlak eksperti Ramil Osmanlı Ednews-a açıqlamasında bildirib ki, Azərbaycanda təqribən son 10-15 ildə baş verənlər onu göstərir ki, daşınmaz əmlak qiymətlərinin istər satış, istərsə də kirayə qiymətləri aylıq və minumum orta əmək haqqı ilə ölçülməsi statistik olaraq yanlış olur.
“Çünki bu daha çox makro iqtisadi amillərə bağlı bir məsələdir.
Daşınmaz əmlak bazarında qiymət artımı və ya azalmalı baş verən dövrlərin təhlili göstəririr ki, bu daxili faktorla bağlı olsa da daha çox xaricdən valyuta axınlarının istiqaməti buna təsir göstərir. Bütövlükdə deyərsək, Azərbaycanda əmlak qiymətləri real bazar qiymətlərinə uyğun və adekvat deyil. Nəzəri iqtisadi tendesiyalarla yanaşı inzibati qaydaların təsiri müşahidə olunur.
Əsasən də inzibati qaydalar qiymət dəyişiklikləri ilə bağlı iqtisadi amillərdən daha öndə gəlir.
Gələcəkdə ölkədə daşınmaz əmlak bazarında qiymət dəyişmələri ümumi iqtisadiyyata adekvat olacaq və ya stabilləşəcək. Lakin bu gün üçün bunu söyləmək tezdir. Faktiki olaraq ölkədə tikinti, quruculuq və şəhərsalma işlərinin həcmi həddən artıq çoxdur”.
Əmlak eksperti əlavə olaraq qeyd edib ki, kirayə qiymətləri əmlak qiymətləri ilə paralel olduğuna görə kirayə qiymətləri də tənzimlənir:
“Əhali sayının artması ilə bağlı hazırda kirayə məzillərə tələb yüksəkdir. Təklif isə azalan xətti üzrə davam edir. Şəhərsalma tədbirləri nəticəsində ilbəil qiymətlərin artımına səbəb olur”.
Xəyal Ramiz