Rusiya sülhməramlıları avqustun 1-də dörd azyaşlı uşağı ilə Şuşaya qayıtmaq istəyən 32 yaşlı İzaura Balasanyanı saxlayıblar. Rusiyalı sülhməramlılar Balasanyanı Xankəndidə yerləşən Təhlükəsizlik Xidmətinə təhvil verib. EDNews.net xəbər verir ki, bu barədə Balasanyan özü müsahibəsində bildirib.
“Bəli, mən Şuşaya getdim, çünki yaşamağa yerim yoxdur. Mən vəfat edən ərimin və anamın fotolarını və uşaqlarımı da götürüb Şuşaya qalxdım. Rus əsgərlərinin olduğu posta çatanda məni ora saxladılar və şəhərə buraxmadılar. Onlar mənə dedilər ki, "lazım deyil, bu sənin xalqına baş ucalığı gətirmir". Türklərlə (azərbaycanlılar - red.) rusların arasında dayanmışdım Bu zaman ruslar öz rəhbərlərinə zəng etdilər, o da nazirliyə müraciət etdi ki, bəs sizinkilərdən biri uşaqları ilə birlikdə türklərə təslim olur. Beləliklə, Təhlükəsizlik Xidmətinin adamları gəldi", qadın deyir.
Balasanyan Şuşaya qayıtmaq istəməsinin səbəblərini də açıqlayıb. Bildirib ki, Qarabağ müharibəsindən sonra onu ailəsi ilə birlikdə Xankəndində bir yataqxanaya yerləşdiriblər. Lakin sonradan 100.000 dram (təxmini 340 AZN) kirayə haqqı olan otağın qiyməti birdən-birə 150.000 drama (təxmini 510 AZN) qaldırılıb. Bundan sonra İzaura onun ailəsini yaşamaq üçün başqa bir yerlə təmin etmək üçün bütün dövlət qurumlarına müraciət etməsinə baxmayaraq, onun xahişi cavabsız qalıb. O da Şuşaya qayıtmağa qərar verib.
O, müsahibəsində bildirib ki, müharibədən sonra yüzlərlə erməni onun vəziyyətindədir. Hökumət heç bir tədbir görmür, onlar da çıxış yolunu Azərbaycan tərəfə keçib heç olmasa normal insan kimi yaşayacaqlarına ümid edirlər. Şuşa və ətraf rayonlarda gedən quruculuq işlərində iştirak etmək və bununla da özlərinə çörək pulu qazanmaq imkanı əldə etmək fikrindədirlər. Onlar düşünürlər ki, Xankəndidə əsir kimi xüsusi nəzarətdə yaşamaqdansa, Azərbaycan vətəndaşlığını qəbul edib normal güzəran qurmaq daha ümidvericidir.
Lakin sadə xalqın bu istəyi revanşist erməni qüvvələri və bacarıqsız yeni hakimiyyət tərəfindən qəddarcasına alınır. Balasanyan qeyd edib ki, orada hamı azərbaycanlılarla sülh şəraitində yaşamaqdan başqa çıxış yolu olmadığını hamı yaxşı bilir. Balasanyan ailəsinin məcburi qayıdışından sonra İzaura Əsgəran yaxınlığında xarabalığa çevrilmiş Xanyeri kəndində ilanla dolu bir ev ayrılıb. Bir müddət sonra tanışlarından biri onu Zəngəzur ərazisinə köçürüb. İndi Balasanyan orada azyaşlı uşaqları ilə şəraiti olmayan, çətin sosial şəraitdə yaşayır və gələcək haqda heç bir ümidləri yoxdur.
PS. Belə aydın olur ki, Rusiya sülhməramlıları erməni millətindən olan Azərbaycan vətəndaşlarının inteqrasiyasına və normal yaşamasına mane olur.
