İsrail Livanın cənubunda nəzarət etdiyi sərhəd ərazilərindən qoşunlarını çıxarmayacaq.
EDnews xəbər verir ki, bunu İsrailin Baş naziri Benyamin Netanyahu “Bibliya yolu” adlandırılan avtomobil yolunun tikintisinə başlanılması mərasimində deyib.
Netanyahunun sözlərinə görə, İsrailin şimal rayonlarında təhlükəsizliyin və normal həyatın bərpası üçün Livanın cənubunda “təhlükəsizlik zonasının” saxlanılması vacibdir.
O bildirib ki, İsrail bu əraziləri təhlükəsizlik ehtiyacları tələb etdiyi müddətdə tərk etməyəcək.
Baş nazir qeyd edib ki, İsrail ordusunun Livandakı fəaliyyəti nəticəsində İsrail yaşayış məntəqələrinə mümkün quru hücumu təhlükəsi aradan qaldırılıb və “Hizbullah” hərəkatının raket potensialına ciddi zərbə vurulub.
Bununla belə, Netanyahu bu istiqamətdə görüləcək işlərin hələ çox olduğunu vurğulayıb:
“Əslində mübarizə hələ başa çatmayıb və bizi qarşıda yeni çağırışlar gözləyir. Bu çağırışlar bizdən sakitlik, təhlükəsizlik maraqlarımızın müdafiəsində qəti mövqe və eyni zamanda bizimlə çiyin-çiyinə mübarizə aparan amerikalı dostlarımızla mühüm münasibətlərin qorunmasını tələb edir”.
Netanyahu əlavə edib ki, Livanın cənubundakı “təhlükəsizlik zolağı” İsrail vətəndaşlarını və yaşayış məntəqələrini təhlükəli qruplardan ayırır. Onun sözlərinə görə, təhlükə tam aradan qalxana qədər bu zolaq saxlanılmalıdır.
Qeyd edək ki, “Bibliya yolu” adlandırılan 60 nömrəli avtomobil yolu Negev bölgəsini Qalileya ilə birləşdirəcək. Netanyahu mərasimdə bu yolun İsrail xalqının tarixi yaddaşı baxımından xüsusi əhəmiyyət daşıdığını bildirib.
