“Qara Yanvar insanlığın despotizm və tiranlıq üzərində qələbəsidir”– Mahmud Ul Hasan.

İrlandiya, Britaniya və Pakistandan olan ekspertlər 1990-cı ilin yanvarın 20-də Azərbaycan xalqının başına gəlmiş qanlı faciə - Qara Yanvar günü ilə bağlı EDNews-a açıqlama veriblər.

Ekspertlər açıqlamalarında 20 Yanvar faciəsini bəşəriyyət tarixində insanlıq əlehinə törədilmiş cinayət hesab ediblər.

Osmanlı imperiyası və Qafqaz tarixi üzrə araşdırmaçı Patrik Uolş qeyd edib ki, 1990-cı ilin yanvar ayında baş vermiş hadisələr Azərbaycan xalqının tarixində qanlı səhifələrdir.  

“Qarbaçov Azərbaycan xalqını mərkəzi hakimiyyətə tabe etdirmək üçün qırğına və kütləvi zorakılığa əl atdı. Lakin bu əksinə oldu. Kremlin repressiyaları nəinki Azərbaycan xalqını meydanlara çıxartdı, hətta Azərbaycanda sovet hakimiyyətinə son qoydu. Mənasız kütləvi qətliamlardan sonra Qarbaçov Kommunist partiyasının siyasi monopoliyasını aradan qaldıraraq, Sovet İttifaqının dağılmasını daha da sürətləndirdi. Qarbaçovun yalnız fəlakət doğuran islahatlarına vaxt qazandırmaq üçün Sovet qoşunları Bakıda 130 dinc insanın öldürülməsinə bais oldu”.

Britaniyalı siyasi ekspert Taras Kuzio bildirib ki, 1990-cı ilin yanvarın 20-də Sovet qoşunlarının dinc nümayişçiləri və sakinləri gülləbaran etməsi Kremlin Ermənistana açıq dəstəyidir.

“Qarbaçov nəinki 20 Yanvar hadisələri, hətta 1989-cu il Gürcüstanda və 1991-ci il Baltikyanı ölkələrdə törədilmiş qətliamlara görə məsuliyyət daşıyır”.

“Bununla bərabər, Birinci Qarabağ müharibəsində Moskva açıq şəkildə Ermənistan silahlı qüvvələrini dəstəklədi. Hətta, 1992-ci ilin fevral ayında Xocalıda 600-dən çox dinc azərbaycanlının erməni qüvvələri tərəfindən qətliam edilməsində Rusiyanın bölgədə yerləşdirilmiş 336-cı polku xüsusi yer alır.  Bütün bunların hamısı Rusiyanın Ermənistana açıq şəkildə dəstəyidir”.

Pakistanın Avrasiya regionu üzrə tanınan siyasi eksperti Mahmud Ul Hasan Azərbaycan xalqının Sovet ordusuna nümayiş etdirdiyi şücaəti və qəhrəmanlığı insalığın despotizm və tiranlıq üzərində qələbisi hesab edib.

“Bəşər sivilizasiyası yarandığı gündən insanlıq qəddarlığa, repressiyalara, təcavüzlərə və işğallara qarşı mübarizə aparır. İnsanlar hər zaman müstəqillik, azadlıq, insan hüquqları və sosial ədalət uğrunda vuruşublar. Xalqların mübarizəsi onların öz milli tarixlərində köklü dəyişikliklərə gətirib çıxarıb. Azərbaycan dövləti və onun xalqı sübut etdi ki, müstəqilliyi şəhadət yolu ilə nail olmaq olar. Qara Yanvar Azərbaycan xalqını müstəqillik və azadlıq yoluna aparan bir hadisədir”.

“Sovet tankları və silahları Azərbaycan xalqının müqavimət əzmini qıra bilmədi. Azərbaycan xalqı sovet işğalı üzərində qələbə qazandı.  Bu qətliam  SSRİ-yə regional təcrid və beynəlxalq qınaqdan başqa heç nə gətirmədi”.

Yunis Abdullayev

• Tag:
• Qara Yanvar